Umiarsuarnut takornariartaatinut akitsuut Naalakkersuisut appartinniaraat

Takornariat umiarsuarnut ilaallutik nunatsinnut tikittartut ukiumut 30.000-init 20.000-inut ikileriarsimapput.

Takornariamut ataatsimut, umiarsuarmut takornariartaammut ilaasumut, akitsuut ullumikkut 525 koruuniuvoq.

Taama qaffasitsigisumik akitsuuteqartitsinermi Kalaallit Nunaat umiarsuarnik takornarianik ilaasoqarluni ingerlatsinermi nunarsuarmi akisunerpaanut ilaavoq, taamaattumillu umiarsuit takornarianik ilaasoqartut amerlasuut Kalaalllit Nunaannut tikinneq-ajorput.

Tamannalu unitsinneqartariaqartoq Naalakkersuisut siulittaasuat Aleqa Hammond oqarpoq.
 
- Umiarsuarnut takornariartaatinut ilaallutik tikittartunut akitsuutit appartinneqarnissaat qulakkeerniarlugu Naalakkersuisut suliniuteqarput, taamaalillutik akiitsuutit unammillersinnaasut akigitinneqalissammata aningaasallu amerlanerusut takornariaqarnermut atugassat qulakkeerneqarlutik, Aleqa Hammond oqarpoq.

Akitsuutip appartinneqarnerata saniatigut akitsuuseeriaatsit allanngortinneqassapput.

Umiarsuarnut takornariaqartaatinut ilaasumut ataatsimut akitsuummik akiliisoqartarpoq, taanna paxafgiftemik taaguuteqarpoq.

Akitsuut nutaaq atuutilerpat umiarsuup angissusia aallaavigalugu akitsuusersuisoqalissaaq.

Umiarsuup angissusia aallaavigalugu akiitsut atuutilerpat Islandimi akitiginneqartoq akeqqatigilissaava, ullumikkullu akigitinneqartunut assersuukkuminaalluni.

- Akitsuutip malunnaatilimmik appartinneqarnissaa pineqarpoq, Tina Jensen inuussutissarsiornermut naalakkersuisoqarfimmi immikkortortaqarfimmi pisortaq radioaviisimut oqarpoq.

- Akitsuut atuutilersussaq aalajangiiffigineqaqqaassaq, aningaasaqarnermut inatsisip inatsisartuni upernaakkut suliarineqarneranut atatillugu.

Umiarsuit takornariaqartaatit angissusaat oqimaasusaallu aallavigalugu akitsuut pilersaarutit malillugit aappaagu 2015-imi atuutilissaaq.