Umiarsuarnik tiguaasartut saassussiniarnitik Londonimit aaqqissuuttaleraluttuinnarpaat
Somaliap sineriaani piiasut umiarsuarnik tiguaaniarnerminni nunartik aallaavigiunnaarlugu Tuluit Nunaanni illoqarfiit pingaarnersaat London atortorissaaqalutik aallaavigilersimagaat paasineqarpoq.
Londonimiimmi umiarsuit qaammataasat iluaqutsiullugit malinnaavigineqartarput. Londonimi immikkut ilisimasallit akilerluarlugit ikiortiserisarpaat. Paasissutissat pissarsinarnerpaat pissarsiarisarpaat.
Umiarsuarnik tiguaasoqaraangat tiguaasut Londonillu akornini qaammataasatigut attaveqaqatigiinnerit kipititassaajunnaartartut, umiarsuit tiguarneqarsimasut naalagaasa ilaat oqaluttuarput.
Umiarsuup naalagaata Tyrkiamiup oqaluttuaraa umiarsuani piiaasunit qaammatini marlunni tigusaaqqanerani piiaasut Londonimilu akunnermiliuttut akornini aningaasat akiliutigineqartussat isumaqatigiinniassutigisimaneqarneri. Tiguaasimasut tuluttorluinnaq oqaluttuusimapput, qaffasissumillu USA-mi ilinniagaqarsimallutik.
Aningaasat milliardilikkaat piumasarineqartalermata nunarsuaq tamakkerlugu perlulioqatigiit umiarsuarnik tiguaasarnerit aqutarilersimavaat. Umiarsuup naalagaa Tyrkiamiu oqaluttuarpoq tiguaasut ilaata oqaluttuukkaani amigaateqarani, nunaminilu nukappiaqqat nuannaartoraluni namminneq angisuunngorunik piiaasunngorumaarnertik oqaatigisaraat.