Umiarsuarnik takornariartarneq annertuallaangajalerpoq
Umiarsuit atorlugit takornariat 30.000-ngajaat siorna nunatsinnut tikipput 2011-milu pilersaarutit malillugit aamma ingerlalluartoqarnissaa ilimanarluni naak suli kisitsisinik taasaqartoqarsinnaanngikkaluartoq qassit missaat 2011-mi nunatsinnut takornariarumaarnersut.
Siumukarnerli illuatungeqarpoq takornariat tusintilikkaat nunatta pinngortitaa nungullajasoq tummartalissappassuk. Taamaattumik Destination Avannaani pisortaq Per Rosing Petersen isumaqarpoq umiarsuit atorlugit takornariat amerlinissaat attanneqarsinnaanngitsoq.
- Maanna killiffipput imaappoq umiarsuit atorlugit takornariat amerlinissaat attassinnaanagu. Tassami pinngortitarsuarput nungullajasoq innarlerneqassagaluaruni ukiorpassuarni iluarsiniartussaavoq, taama Per Rosing Petersen KNR-imut oqarpoq.
- Taamaattumik anguniagassarput tassaalerpoq qulakkiissallugu takornariaqarnerup annertunerusumik inuiaqatigiinni isertitsissutaanissaa. Immitsinnut aperisariaqarpugut toqqarusunnerlugit takornariat 100.000-it 10 millioner koruuniinnarnik nunatsinni atuisut imaluunniit takornariat 10.000-it 100 millioner koruuninik nunatsinni atuisut. Qularutiginngilara kingulleq toqqarusunnerullugu siunissamullu pilersaarusiornitsinni tamanna tunaartarissavarput, taama Per Rosing Petersen oqarpoq.
Nunatsinni takornariartitsinermut inuussutissarsiornermullu siunnersuisoqatigiit GTE isumaqarpugut umiarsuit atorlugit takornariat amerlinissaat suli attanneqarsinnaasoq.
- Kisianni immitsinnut aperisariaqarpugut qassit tikissanersut aammalu qanoq amerlanerutigisut tikilluaqusinnaanerlugit, taama oqarpoq Malik Milfeldt GTE-meersoq.
Umiarsuartigummi takornariat inerisaavigineqarsinnaapput umiarsualivinnut aningaasat millionilikkaat atunngikkaluarlugit. Misilittakkat takutippaat puttasut ataatsimik ilanerat siuariarnermik aamma nassataqarsinnaalluartoq.
