Umiarsuarni ilisimasortaqartarnissamik inatsisissaq paamaarunneqarpoq
Iluarsisaq:
Naalakkersuisut maannakkut siulii pilersaaruteqarput, soorlu takornariartassuit, umiarsuit ilisimasassarsiornermut atorneqartartut assartuutillu, nunatta imartaani angalanissamut ilisimasaqarnerminnik uppernarsaasinnaanngitsut, angalanerminni pinngitsooratik ilisimasoqartassasut.
Inatsisartut 2008-mi upernaakkut ataatsimiittussaatillugit inatsisartuni ilaasortaq Josef Motzfeldt, IA, aalajangiiussassatut ilaatigut siunnersuuteqarpoq takoriartaassuit nunatsinni angerlarsimaffeqanngitsut nunatta imartaani angalanerminni pinngitsooratik nunatta imartaanik ilisimasortaqarlutik angalasariaqartut.
Siunnersuutip siullermeerlugu saqqummiunneqarnerani, Naalakkersuisunut taamanikkut ilaasortaasoq Kim Kielsen, akissuteqaammini ilaatigut nassuiaavoq suleqatigiissitap ”Kalaallit Nunaata imartaani imaatigut angallanneq isumannaatsoq” nalunaarusiaata inassuteqaatai tunngavigalugit suleqatigiissitamik pilersitsisoqarsimasoq.
Suleqatigiissitap misussugaasa ilaat tassaallutik nunatta imartaani sumiissusersiorsinnaasunik, sikunik alapernaarsuinermi aamma sumiissusersiorsinnaasunik kiisalu ilisimasortaasinnaasunik qanoq pisariaqartitsoqartiginersoq.
Kim Kielsen akissuteqaammini erseqqissaavoq nunatta imartaanik ilisimasortaqarnissaq pillugu suleqatigiissitap inernilersimagaa nunatta imartaanik pinngitsuunngivilluni ilisimasortaqartarnissamik periarfissaqanngitsoq.
Suleqatigiissitarli innersuilluni umiarsuit ilaat, soorlu takornariartaassuit, umiarsuit ikummatissamik assartuutit, assartuutit, umiarsuillu soorlu sioqqanik aamarsuarnilluunniit aamma assartuutit nunatta imartaani angalatillutik pinngitsooratik nunatta imartaanik ilisimasortaqartarnissaat pisariaqassasoq.
Naalakkersuisulli taamani naliipput umiarsuit nunatta imartaani angalatillutik pinngitsooratik ilisimasortaqartarnissaat siunertaqanngitsoq, umiarsuit nunatta imartaanik ilisimasortaqareersut pinngitsaalillugit ilisimasortalersorneqartassammata.
- Tamanna tunngavigalugu aalajaangiifigisassatut siunnersuutip akuerineqannginnissaa Naalakkersuisut inassutiginngilaat, Naalakkersuisuni taamani ilaasortaasoq Kim Kielsen erseqqissaavoq.
