Umiarsuarmut ilaasut annaanniarneqartariaqarsimasut

Kujataani ilaasartaat, Aviaq Ittuk, Arctic Umiaq Line-mut naggammik ippassaq angallassinermini motoriminik aserortoorpoq. Inunnik 15-nik ilaasoqarluni pingasunillu inuttaqarluni nalunaaquttap ataatsip missaani sarfaatiterusaartariaqarsimavoq.

Aviaq Ittummut ilaasut ilaat, Aviâja Møller Silassen, oqaluttuarpoq, tamarmik annilaangasimaqalutik.

Ilaasut umiatsiamik annanniummik nunaliaanneqartinnagit annanniuseqquneqarmata, meeqqat marluk qulit missaanni ukiullit annilaanganermit qissasiinnarsimapput.

- Inersimasut arlallit aamma qissapput. Ilaaqatitta ilaat uummalluttuusoq aamma inuummarliuleraluarpoq, Aviâja Møller Silassen oqaluttuarpoq.

- Umiarsuarmi naalakkatut annikillioqaanga. Nalunaaqutaq ataatsimut, tassa aserortoornissarput minutsinik 15-inik sioqqullugu, Alluitsup Paaniit Ammassiviliassalluta aallarpugut. Sila qujanartumik atoruminarpoq anoreqanngingajalluni, Aviaq Ittummi naalagaq, Jens Jørgen Poulsen, oqarpoq. Ilaasut sissaliaanneqarput, qujanartumillu ajoqusertoqanngilaq. Jens Jørgen Poulsen oqarpoq, qujanartumik mallerpiarsimanngitsoq.

KNI-p angallataa, Kimmernat 2, siullersaalluni Aviaq Ittummut apuuppoq umiarsuarlu qatsunganerusumukaallugu. KNI-llu angallataa alla, Johanne Kristine, anngummat, ilaasut tassunga issorarneqarput. Aviaq Ittuk kalillugu Alluitsup Paanut uterput, taamaalineranilu nalunaaqutaq ualikkut tallimanut qiteqqussimavoq.

Aviaq Ittummut ilaasut Alluitsup Paani akunnittarfimmi Qaannivimmi unnuipput, inuttat KNI-p angallataanit, Johanne Kristinamit, Qaqortuliaanneqarlutik.