Umiarsuarmik alapernaarsuummik nutaamik sanaartortoqassaaq
Sakkutuut Skagenimi umiarsualiorfik Karstensens Værft umiarsuassamik Issittumi alapernaarsuisussamik sanaartortussatut isumaqatigiissuteqarfigisimavaat. Umiarsualiorfik taanna aamma Knud Rasmussenimik Ejnar Mikkelsenimillu sanaartortuuvoq.
- Sakkutuut imarsiortut Issittumi suliassanik kivitsisinnaanerat ineriartortinneqassaaq. Taamaammat umiarsuarmik Issittumi, pingaartumik Kalaallit Nunaata pigisaani, suliassanut atugassamik pisariaqartitsivugut, umiarsuimmi tamaani angallannerulernerisigut suliassat amerliartorput, illersornissamut ministeri Nicolai Wammen taama oqarpoq.
Umiarsuup sanaartorneqartussanngortup sakkutuut angallataat Tulugaq pisoqalisoq taarsissavaa, kingusinnerpaamillu 2018-imi naammassineqarsimanissaa naatsorsuutigineqarpoq. Umiarsuaq alapernaarsuut angallammik sukkasuuliamik ujaasinermut annaassiniarnermullu atugassamik peqassaaq aammalu qulimiguulimmut mittarfeqassalluni tonsinillu 1720-nik oqimaassuseqassalluni.
