Umiarsuarmi takornariartaammi saqqummersitsineq
Kalaallit Nunaat aatsaat siullerpaamik umiarsuarujussuarmi takornariartaammi saqqummersitsisoqarnerani immikkut nerrivilerluni Kalaallit Nunaat pillugu takornariarfissatut ussassaarutigalugu saqqummersitsivoq.
Nunatsinni Takornariaqarnermi Inuussutissarsiornermilu Siunnersuisoqatigiit umiarsuarmi takornariartaammi Sea Trade-mi Hamburgimiittumi peqataapput.
- Umiarsuarsuit takornariartaatit takornarianik Kalaallit Nunaannut takornariartitsisartut maannakkorpiaq aatsaat taama amerlatigilerput, maannakkullu suliarisatta ilagaat takornariat pisuut Kalaallit Nunaannut takornariartinniarnissaannut kajungilersinneqarnissaat, Lykke Geisler Yakaboylu oqarpoq.
- Takornariammi pisuut aningaasanik atuinerpaajusarput kiisalu suliffeqarfiit attaviginiarsarisavut tassaapput kalaallit suliffeqarfiutaannik nunatsinniinnerminni suleqatiginnikkusuttut, Nunatsinni Takornariaqarnermi Inuussutissarsiornermilu Siunnersuisoqatigiinni, avammut tuniniaasarnermi pisortap tullia, Lykke Geisler Yakaboylu oqarpoq.
”Sea Trade Hamburg” Europami umiarsuarsuit takornariartaatit saqqummersitsisartut anginersaraat, nunarsuarmilu umiarsuit takornariartaatit saqqummersitsiviusartut anginersaralugu ”Sea Trade Miami”.
Saqqummersitsineq Europami nunani assigiinngitsuni ingerlanneqarpoq, kingullermik illoqarfimmi Napolimi
Italiamiittumi saqqummersitsisoqarluni. Saqqummersitsinermi Kalaallit Nunaanniit peqataapput; Nuuk Tourism, Kangerlussuaq Tourism Destination Disko aamma Destination South Greenland, kiisalu Royal Arctic Line.
