Umiarsuaq utiinnartoq – inuttaq imigassartorsimasutut pasineqartoq
Umiarsuaq Angaju Ittuk Narsaminngaanniit ullaaq aallarami ungasillivallaanngilaq.
Umiarsuarmimi inuttat ilaat imigassartorsimasutut pasineqarmat Narsamut uteqquneqarpoq.
Royal Arctic Line taama paasissutissiivoq.
Umiarsuaatileqatigiiffiup oqarnera naapertorlugu umiarsuup nunatta kujataani nunaqarfinnut peqqumaatissanik pilersuisinnaanissaa pissutigalugu Narsami paarlaasussamik erngertumik ujaasisoqarpoq.
Royal Arctic Line imigassamut tunngatillugu ersarissumik politikkeqarpoq, maleruaqqusanillu unioqqutitsineq akuerineqarsinnaanngitsoq, umiarsuaatileqatigiiffik paasissutissiivoq.
Kalaallit Nunaanni politiit ullaaq nalunaaqutaq 06.57 kalerrinneqarsimallutik uppernarsarpaat. Suliaq maanna misissuiffigineqassaaq, taamaammat annerusumik paasissutissiisoqarsinnaanani.