Umiarsuaq tunitsivik Tunumukartussanngortoq

Arctic Ravenip Tunumi umiarsuarmik tunitsivimmik aallartitsisinnaanissamik qinnutaa, Namminersorlutik Oqartussanit akuerineqarpoq. Piginneqatigiiffimmi Arctic Ravenimi pisortaq, Aksel Blytmann Qulaarpaami oqallittoqarnerani taama oqarpoq.

Allattoq Ivik Kristiansen

septembarip 09-at 2016 13:50

Naalakkersuisunit akuerineqarpugut, massakkullu piareersarparput, Aksel Blytmann oqarpoq.

Kuummiuni tunitsiviup matoqqanera pissutigalugu Tunumi aalisartut tunitsivissaqarsimanngillat. Taamaammat Arctic Raven umiarsuarmik tunitsiviliinissamik Namminersorlutik Oqartussanut qinnuteqarpoq.

Aamma atuaruk Tunu umiarsuarmik tunitsiveqalernissaa neriuutigineqartoq

Naalakkersuisuniillu sisamanngormat akuerineqarsimavoq.

Tamannalu pingaaruteqartoq Kulusummi kommunalbestyrelseimut ilaasortap, Bendt Abelsenip oqaatigaa.

- Pingaaruteqartorujussuuvoq. Saarullerpassuit Tunumut takkupput, ukiullu 30 matuma siorna taama saarulleqartigaaq, Bendt Abelsen oqarpoq.

Aamma atuaruk Tunumi aalisakkanik tunitsivituaq ammaqqissagunartoq

Inuussutissarsiornermut naalakkersuisup, Vittus Qujaukitsup, akuersisoqarsimasoq aamma uppernarsarpaa.

Umiarsuarli tunitsivik naammanngitsoq, Qujaukitsup oqaatigaa.

- Tassuunnga killiinnassalluni naammanngilaq. Ataavartut pioreersut atorluassagutsigit Kuummiuni tunitsivik sulilersinneqartariaqartoq isumaqarpunga. Aamma Taasiilap illoqarfiani pinngitsoorani tunisassiortoqarnissaq aqqutissiortariaqarpoq, inuussutissarsiornermut naalakkersuisoq Vittus Qujaukitsoq oqarpoq.