Umiarsuaq takornariartaat ikkarlittoq
Ilaasut 89-iusut qimagussorneqareerput, tamarmillu ajunngitsut, Sikuiuitsoq Kujalleq pillugu Argentinami pisortaqarfiup pisortaa ilisimatitsivoq.
Nutaarsiassaqartitsivimmi Ritzauimi tamanna allaaserineqarpoq.
Umiarsuup kivinissaa ernumananngilaq, kangerliumanermi Wilhelmina Bayimi ikkarlikkami. Kangerliumaneq taanna qeqertaasamiippoq, Sikuiuitsup Kujalliup Amerikallu Kujalliup kujammut isuata akornanniilluni. Argentina ilaasunik ikiuinissaminut Chilemit ikiorserneqarpoq.
Ikkarlinneq Sikuiuitsumut Kujallermut umiarsuarnik takornariartitsisartut akornanni ingerlaannartumik oqaluuserineqalerpoq.
- Umiarsuit takornariartaatit immami sikulimmi angalanissamut isumannaallisagaanngitsut amerliartuinnartut Sikuiuitsumut Kujallermut angalatinneqartalernerat ernumanarpoq, taama oqarpoq Tony Press Australiamiut Sikuiuitsumut Kujallermut angalatitsisarfianneersoq.
- Umiarsuaq taamaattoq umiussagaluarpat, ilaasunut isumannaatsumik qanittumi annaassiniartussaqanngilaq, Tony Press aviisimut The Australian-imut oqarpoq.
Nunat Sikuiuitsumut qaninnerit New Zealandimi aappaagu katersuunniarput, taqqavani takornariat amerliartuinnarnerisa kinguneranik ajornartorsiutaalersut oqaluuseriumallugit.
