Umiarsuaq Sisimiuni talittarfittaamut "namminersortumut" talittoq siulleq

Umiarsuaq Irene Arctic talittarfittaamut ippassaq talippoq, aquttuunerlu Poul Jensen siullersaalluni talitsitsisuulluni. Aquttullu Sisimiuneersuunerata pisoq nuannernerulersiinnarpaa.

-Illoqarfimmut tamarmut ulloq pingaaruteqartuuvoq, maanimi illoqarfitsinni nammineersinnaalluta takutipparput. Talittarfiup allilerneqarnissaanut atatillugu akileraarut procentimi ataatsimik qaffanneqaraluartoq innuttaasut ajorisimanngilaat. Allat ikiorusunngippatigut nammineersinnaavugut, Nuka Kristiansen allaaserisamut matumunnga assitassamik assiliisoq oqaluttuarpoq.

Suleqatigiissitat Naalakkersuisunit toqqarneqarsimasut Assartuinerlu pillugu isumalioqatigiissitap siulittaasuanit Chresten Sørensen siuttuuffigineqartup naatsorsorsimavaa Sisimiuni talittarfiup allilerneqarnera inuiaqatigiit aningaasaqarnerat eqqarsaatigalugu akilersinnaasoq. Pingaartumik umiarsuit takornariartaatit Sisimiuni allanilu talittarfinnik atuisarnerat nunatsinnut aningaasatigut isaatitsissutaasarput.

-Kommunip tungaanit entreprenørit umiarsualiviup piffissaq eqqoorlugu naammassisinaasimammatigu nersualaarusuppagit. Taamatut suleqatigiinneq tamanut iluaqutaanerpaajusussaammat tapersersorparput, teknikkeqarnermut avatangiisinullu pisortaq Mike Kristiansen oqarpoq.