Umiarsuaq Mauritiusip avataani uuliamik minnerpaamik 1000 tonsimik maqisoortoq
Uulia minnerpaamik 1000 tonsi Japanimiut umiarsuaannit Det Indiske Oceanimi qeqertat ilaanni Mauritiusimi maqisoorsimavoq.
Umiarsuaatileqatigiiffik Mitsui OSK Lines, umiarsuarmik piginnittoq, taama ilisimatitsivoq.
Uulia 500 tonsit missaat umiarsuarmit tiguneqarsinnaasimavoq, uuliarli 2500 tonsit suli umiarsuarmiippoq, maqisoorsinnaanissaallu ernummatigineqarpoq.
Umiarsuaq MV Wakashio Mauritiusip kujammut kangisissortaata avataani juulip ulluisa 25-anni ikkarlippoq, taamanikkulli tassaniilluni. Uuliarli umiarsuarmit sisamanngormat maqisuulerpoq.
Mauritiusillu kissaataa naapertorlugu upalungaarsimasuutitat Japanimeersut arfinillit Mauritiusiliartinneqalerput.
Immikkut sungiusakkat Frankrigimeersut aamma Mauritiusiliartinneqarput, atortunik immikkuullarissunik aamma atortulersugaapput. Mauritius Frankrigip nunasiaatiginikuuaa.
Mauritius avatangiisit pillugit ajornartoorfittut tallimanngormat nalunaarutigineqarpoq.
Mauritiusimi avatangiisit aatsaat taama eqqorneqarnerlutsigisut immikkut ilisimasallit nalilerpaat.
/ritzau/Reuters