Ukraine Ruslandilu karrinik annertoorujussuarnik avammut nioqquteqartartut taakkuninnga nioqquteqarsinnaannginnerat peqqutaalluni inuussutissat akitsoraluttuinnarnerannik kinguneqarpoq.Assi: Oleksandr Gimanov/AFP/Ritzau Scanpix

Umiarsuaq karrinik usisoq Ukrainemi umiarsualiveqarfiit ilaannit avalattoq

Ukraine nunarsuarmi karrinik avammut nioqquteqartut annerit ilagaat. Karrinillu avammut ullumi ataasinngornermi nioqquteqaqqilerpoq.

Karrit tonsinik millionilikkaanik oqimaassusillit Ruslandip Ukrainemik tiguaaneranit qaammatit tallimat matuma siornali Ukrainemit assartorneqarsinnaasimanngitsut umiarsuarmit avammut ullumi ataasinngornermiit assartorneqalerput.

Karrit Sortehavi aqqutigalugu avammut ullumi ataasinngornermi nioqqutigineqaleqqipput. Sortehavi nunat tamat inuussutissaqarnissaannik pingaaruteqartutut inissisimavoq.

Rusland Ukrainelu Naalagaaffiit Peqatigiinni isumaqatigiissuteqarnerisa kingorna umiarsuaq siulleq Odessamit ataasinngornermi ullaakkut aallarpoq.

Taama nalunaaruteqarpoq Tykia, nuna taanna isumaqatigiissuteqarnermi isumaqatigiitsitsiniartartuuvoq.

Karrinik Ukrainemit avammut nioqquteqarneq nunarsuarmiunit malinnaaffigeqqissaarneqarpoq.

AAMMA ATUARUK Umiarsuaq karrinik usisoq Ukrainep umiarsualiveqarfianit avalattoq

Ukraine nunarsuarmi karrinik avammut nioqquteqartut annerit ilagaat.

Rusland Ukrainemik saassussilluni aallartimmalli karrit tonsinik millionilikkaanik oqimaassusillit Ukrainemit assartorneqarsinnaasimanngillat, Ukrainemi umiarsualiviit Ruslandimit mattunneqarmata.

Nunat taakku marluk karrinik annertoorujussuarnik avammut nioqquteqartartut karrinik nioqquteqarsinnaannginnerat peqqutaalluni inuussutissat akitsoraluttuinnarnerannik kinguneqarpoq.

Isumaqatigiissuteqarnermi Naalagaaffiit Peqatigiit pingaarutilimmik anguniagaqarpoq, tassalu inuussutissat akitsoraluttuinnarnerisa kingunerisaanik inuit miliuuninik amerlassuseqartut perlinnginnissaat.



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl