Umiarsuaq kabelimik iluarsaassisussaq nunatsinnukaleruttorpoq
Canadamiummi umiarsuaat immap naqqatigut kabelimik iluarsaassisussaq Horizon Enabler Canadamit kiisami avalappoq, nunatsinnullu ingerlaaleruttorluni.
Tamanna nittartakkakkut umiarsuit sumiiffiinut nalunaarsuisartup Marinetraffic-ip nittartagaani takuneqarsinnaavoq.
Umiarsuaq Sisimiut kujataatungaani immap naqqatigut kabelimik suliaqartussaavoq, Sisimiullu kujataatungaanukartinnani Nuummukaqqaartussaalluni, immap naqqatigut kabelip iluarsaanneqarnissaanut kingoraartissanik Nuummi aalleqqaassalluni.
Umiarsuaq februaarip naajrtulernerani Nunatsinnukartussaagaluarpoq, silarlunnerali pissutaalluni Canadami St. Johnsip umiarsualivianiiginnartariaqarsimalluni.
Aqqutissaani silarlussanngippat umiarsuup Horizon Enablerip Nuummut marsip ulluisa arfernanni tikinnissaa naatsorsuutigineqarpoq.
Sisimiunit 30 kilometerisut kujasitsigisumi kabeli kilisaammit aqqutalugineqarluni ajoquserneqarmat januaarip 21-anili atorsinnaajunnaarpoq.
