Umiarsuaq inuulluarit
Royal Arctic Linep umiarsua Irena Arctica Tasiilamiit marlunngornermi ullup qeqqa aallarpoq. Pisarneq malillugu meeqqat atuartut inersimasullu umiarsualiviliarput umiarsuaq inuulluaqullugu aalateriffigiartorlugu.
Tasiilaq taamaasilluni upernaap naalernerani aatsaat umiarsuaqaqqittussanngorpoq, qaqugulu umiarsuaq siulleq tikissanersoq 2012-mut pilersaarut piareerpat aatsaat nalunarunnaassaaq.
-Pisarneq malillugu umiarsualivimmiit qummoroortartorluta inuulluaqqusivugut umiarsuarlu Irena Arctica akilluni nilliatitsisarpoq, Tasiilami umiarsualiviup pisortaa Gaba Kristiansen KNR-imut oqaluttuarpoq.
Royal Arctic Line ukiormanna misiliigaluarpoq pisarnermit siusinnerusukkut Tasiilamut umiarsuaqartitseriarluni. Maajili qiteqqutiinnartoq umiarsuaqatitseriaraluarneq iluatsinngitsoorpoq sikorsuit pissutaallutik. Aamma taamatoqqissaaq pisoqarpoq juuni aallartilaartoq umiarsuaq utiinnartariaqalermat sikorsuarnit assertilluni.
