Sisimiut avannaani sikoqarnera pissutaalluni kabelinik iluarsaassinissaq ajornarallarpoq, tamannalu pissutigalugu umiarsuaq iluarsaassisussaq, Horizon Enabler, sapaatip akunnerata naanerani Nuummiit Qaqortup tungaanut ingerlassaaq.

Kujataanili silap qanoq innissaa aamma apeqqutaassaaq. Iluarsaassineq marlunngorpat marsip ulluisa 19-aani 2019-imi pilersaarutit naapertorlugit aallartinneqassasoq, Tele-Postip nalunaarutigaa.

AAMMA ATUARUK Telepost umiarsuarmik aaqqissuiartortussamik suli nassaanngitsoq

Tamannalu Tele-Postip Kujataani atuisuinut kinguneqassaaq, iluarsaassinermi aallartippat kujataani internetimut attaveqaatit tamarmik Paamiuniit Narsaq kujalleq ilanngullugu qaminneqassapput.

Tele-Postilli taamaakkaluartoq nalunaarutigaa oqarasuaatit, mobilikkut attaveqaatit, sms-inillu nassitsisinnaanerit, TV-mullu radio-mullu attaveqaatit ataannassasut, attaveqaatilli pitsaanerunnginnissaat atuisut aamma naatsorsuutigisariaqassagaat. Immap naqqatigut kabelinik iluarsaassinerup ullunik 15-inik 20-llu akornanni sivisutiginissaa naatsorsuutigineqassaaq.

- Imaatigut kabelinik aaqqissuussinermi sakkortusaaviup attavia atorneqartussaavoq, taannalu attavia killeqartorujussuuvoq. Taammaammallu sullissinerput killeqartumik ingerlasariaqassaaq, Tele-Post oqarpoq.

Kujataani attaveqaatit matoqqanerisa nalaanni sullitat internettimut akiliuteqassanngillat, aningaasallu utertoorutissat qanoq amerlatiginissaat kabelinik immap naqqatigoortunik iluarsaassineq naammassineqarpat aalajangerneqarumaartoq, Tele-Postip oqaatigaa.