Umiarsuaq ikaartaat Norgep eqqaani ikkarlippoq
Norgimi umiarsuaq ikaartaat Richard With Trondheimip avataani ippassaq ikkarlinnermigut immalermat ilaasut 153-it inuttallu sisamat, ikuallattoqalerneratigut majuartarfikkut niusariaqarsimapput.
Ikkarlittoqarneranik kalerrisaarisoqalermat sinerissamik nakkutilliisut, politiit, qatserisartut umiarsualivimmilu sulisut kiisalu annaassiniartartut anorlersukasiugaa annaassiniarput. Nalunaaquttap akunneri pingasut qaangiummata tamarmik nunamukaanneqartut, nutaarsiassaqartitsivik NTB nalunaarpoq.
Umiarsuaq Richard With kujammut ingerlaartilluni ikkarlippoq, taamalu Bergenimut ingerlaqqissinnaajunnaarluni. Umiarsuaq immap naqqanut sarpimmissimavoq.
- Umiarsuaq ajunngitsoq oqaatigineqarpoq, anorili ajornartorsiutaasinnaavoq, tassami umiarsuaq tippussaasinnaagami, annaassiniartut pisortaat Ola Vaage NTB-mut oqarpoq.
Umiarsuaatileqatigiit oqaaseqartitaat Ragnar Norum oqarpoq annaassiniarneq uippallerfiunngitsumik ingerlanneqartoq, ilaasullu tamarmik ajoquserneqaratik nunaliaanneqartut.
