Umiarsuaq atomip nukinganik nukissiorfik danskit imartaatiguulersoq
Umiarsuaq atomip nukinganik nukissiorfik "Akademik Lomonosov", Ruslandimi ukiup tulliani singinneqarpat tamanna pissaaq.
Atomip nukinganik nukissiorfissuaq prammersuarmik toqqammaveqarpoq Skt. Petersborgimilu sananeqarluni. Taanna Østersøkkoorluni angalassaaq, Storebæltillu ikaartarfissua ataaqquteriarlugu Norgep sineriaa atuarlugu Siberiap avannaani apuuffisaminut ingerlaassalluni.
Tassani Ruslandimi sumiiffinnut avinngarusimanerpaat ilaannut innaallagissamik pilersuissaaq imermillu tarajuiaavittut atorneqassalluni.
- Isumatusaarnerunngilaq, Greenpeace pilersaarut pillugu taama oqarpoq.
Avatangiisinik illersuiniaqatigiiffik Greenpeace umiarsuarmik unitsitsiniaassanersoq Greenpeacimeersup Tarjei Haalandip oqaatigerusunngilaa, illersuiniaqatigiiffiulli suliamut akerliunera isertuutinngilaa.
- Issittup imartaani sikorpassualimmi anorersuartartumilu, nunallu sajunneranik eqqugaasinnaasumi atomip nukinganik nukissiorfeqalernissaa qinngornernik ulorianartunik akulinnik eqqaaffiusumik isumassarsiaavoq ajorluinnartoq, Haaland oqarpoq nangillunilu:
- Arlaannik pisoqariataassappat saliiniarneq pisariusorujussuussaaq. Russit atomimut tunngasunut teknologiiat sussaanngilaq. Russit aqqartartunik atomip nukinganik ingerlatilinnik atorunnaakkanik Murmanskip eqqaani inissiisimapput, taamaammat sillimaniarnermut tunngatillugu taakku tutsuiginassuseqanngillat, Greenpeacemeersoq oqarpoq.
Umiarsuaq atomip nukinganik nukissiorfiusoq pillugu videoliaq ataani isiginnaarneqarsinnaavoq:
