Umiarsuaq assartuut Kangianut Aqqutikkoortoq siullerpaaq
Angalaneq, Norgep avannarpasissuani illoqarfimmit umiarsualiveqarfimmit Kirkenesimit septembarip sisamaanni aallartippoq, umiarsuarlu Kangianut aqqutikkoorluni Kinami Qingdaoimukarpoq.
Nalinginnaasumik aqqut atorsimagaluaruniuk, tassa Suezip ikerasaliaatigoorluni imaluunniit Afrikas Hornikkoorsimagaluaruni, angalanera ullunik 15-inik sivisunerusimassagaluarpoq, aamma taamaalilluni 8.000 kilometerit angalanermi sipaarneqarput.
Umiarsuaatilik, Christian Bonfils, nittartakkamut news.comimut oqarpoq angalaneq ajornartorsiutitaqanngitsumik pisimasoq.
- Angalanerput tamaat immami ammasumiippugut, tassa immap 85 procentia ammavoq. Kangianut aqqummi ilaatigut sikoqaraluarpoq, aqqutittali annersaani ajornartorsiuteqanngivilluta sukkanissarput tamaat angalasinnaasimavugut, oqaluttuarpoq.
Orsussap, suliffiullu sivisussusaata sipaarneqarnerisa saniatigut, Suezip ikerasaliaatigoornissamut, taavalu imaani piiaaffigineqarnissamut sillimasiinermut nalinginnaasumik akileraarutigineqartartut, aamma sipaarutigineqarput, Christian Bonfils oqarpoq, nangillunilu:
- Umiarsuaatileqatigiiffik russit sikunik aserorterutaannut, "Nordic Barents"-imut Kangianut aqqummi ingialluisussamut, aningaasartuuteqaraluarluni, angalanermi tusind dollarserpassuit sipaarneqarput, Bonfils nittartakkamut news.comimut oqarpoq.
Avatangiisinik ilisimatuut Ruslandimiit USA-miillu tikkuaapput, umiarsuit Kangianut aqqutikkoortartut amerliartorneranni avatangiisit mingutsinneqarnissaat annertusissagaluartoq, tamaanaqqussinnaanerup aqqutinngornissaa kikkut tamarmik naatsorsuutigigaat.
