Umiarsualiviup allinissaanut peqataarusuppoq

Aalborgimi umiarsualivik Nuummi umiarsualivimmik alliliiniarnermut atatillugu ilanngunniarpoq.
Allattoq Elisa Isaksen
januaarip 14-at 2008 05:20

Aviisi Nordjyske Stiftstidende ullumikkut taama allaaserisaqarpoq.

Tamatumani eqqarsaataavoq piginneqatigiiffik namminersortoq Aalborg Havn Nuummi umiarsualivissamut aningaasaleeqataasinnaassasoq, tassami umiarsualivik nunatsinnut assartuinermi maanna peqataareermat.

2007-imi nunatsinnut assartuineq suliariumannittussarsiuunneqarmat Aalborg Havn ajugaavoq, taamalu pissusissamisuussaaq Aalborgip Nuullu akornanni attaveqatigiinnerit nukittorsarneqarpata, taamalu Nuummi umiarsualiviup allineqarnissaanut akuutinneqarnissarput, Aalborg Havnip pisortaa Claus Holstein aviisimut oqarpoq.

- Uagut suleqatigineqarnissatta pitsaaqutigaa aningaasanik aatsaat ukiut 30-t imaluunniit 50-t qaangiuppata taarsersorneqalersussanik aningaasaliisinnaagatta, umiarsualiviup pisortaa ilanngullugu oqarpoq.