Umiarsualivimmik assersuinissartik taamaatiinnarpaat
- Sisimiuni aalisartut nuannaarutigaat, Inatsisartut Aalisarnermut, Piniarnermut Nunalerinermullu ataatsimiititaliaannit tamakkiisumit ilalerneqarnertik.
Sisimiuni Aalisartut Piniartullu peqatigiit, SAPP sinnerlugit tusagassiuutinut nalunaarummi taama allappoq, Leif Fontaine.
Taanna aamma allappoq, Sisimiuni aalisartut pissutsit aalisarnikkut equngaqisut inuiaqatigiinnut malunnartereerlugit, aalisartut immikkut iliuuseqarsimanertik ilorraap tungaanut aallariarnermik kinguneqartoq, Sisimiuni aalisartunit nalilerneqarmat.
Aamma atuaruk Sisimiuni aalisartut umiarsualivimmik mattussinissartik kinguartikkallarpaat
Leif Fontaine aamma allappoq, Sisimiuni aalisartunit erseqqissaatigineqarmat, aalisartut akerliussutsimik takutitsereernerisa kingorna, aalisakkanik tunisassiorfik namminersortoq, Sisimiuni aalisartunik suleqateqarluni aalisakkanik tunisassiorfimmik pilersitsisoqarnissaa maanna pilersaarutigineqalermat.
Leif Fontainilli maanna oqaatigisinnaannginnerarpaa, aalisakkanik tunisassiorfik namminersortoq kimit pigineqarnersoq, tamannali kingusinnerusukkut nalunaarutigineqarumaartoq, KNR-imut oqarluni.