Umiarsualiviliortoqarnissaa nukingisaarutigaat

Nuummi umiarsualiviup allineqarnissaa, allamiluunniit sananissaq kilisaataatilinnit utaqqikatanneqartoq, piginneqatgiilluni kilisaataatilinni Qajaq Trawl-imeersoq Knud Trolle oqarpoq. Taassuma Nuup kommuneani borgmesteri Agnethe Davidsen nersualaarpaa, umiarsualivimmik kommune-p nammineq sananiarnera siulissutiginiarmagu.

Nuummi umiarsualiviup piorsarneqarnissaa pillugu pilersaarusiorluarnissaq pisariaqartinneqarpoq, assersuutigalugu massakkut kilisaatit usingiarnissamut tulleriiaatariaqartarmata. Kilisaatit ataasiakkarlutik usingiarniartarnerat ajornartorsiutaasoq Qajaq Trawl-ip kilisaataani Markus-imi raajanik 800 tons-nik useqarsinnaasumi piginnittoq Knud Trolle oqarpoq.

- Usingiartakkagut raajat ingerlaanaq containerinut ingerlatinneqartartuussaammata containerit umiarsuup eqqaani inissisimasussaagaluarput. Tamannalu ajornartorsiutaasarpoq umiarsualivik tattorliuuffiummat, Knud Trolle oqarpoq.

Ilanngullugu nassuiaavoq, Royal Arctic Line arlaleriaqaluni ataatsimeeqatigineqartariaqartartoq, usingiarniarnermi paarlaattoqarsinnaanera eqqarsaatigalugu. Tamannalu ukiup ataatsip ingerlanerani ajornaatsuinnaaneq ajortoq oqaatigaa.

Raajarniutaatillillu aamma ukioq ataaseq sioqqullugu qaqugukkut usingiartarnissartik pillugu isumaqatigiinniartariaqartarsimapput.

-Massakkut atlantiku ikaarlugu angallatinut Nuummi talittarfittaartoqanngippat allamik Nuummi suliffissat ikigisassaangitsut annaaneqassasut Knud Trolle aamma isumaqarpoq. Assersuutigaa namminneq ilaatigut Island-imut usingiartariaqartarlutik, tamatumalu kingorna aalisarneq tunumi ingerlanneqaqqittartoq Knud Trolle oqarpoq.