Umiarsualivik containerersorfiusoq pillugu oqallinneq ingerlaqqippoq

- Uanga Naalakkersuisutut ersarinnerusimasinnaagaluarpunga, taavalu nassuiaassinerusimasinnaagaluarlunga. Kisianni isumaga naapertorlugu illuatungaani aningaasaqarnermut ataatsimiititaliaq apeqquteqarsimagaluarpat uannut aamma periarfissaasimagaluarput aggersarsimassallunga aamma nassuiaaqqullunga, Ineqarnermut, Attaveqarnermut Angallannermullu Naalakkersuisoq Jens Blidorf Frederiksen oqarpoq.

Sapaatip akunnera kingulleq qinnuteqaataasut 3,4 milliuunit kooruniusut aningaasaqarnermut ataatsimiitsitaliamit itigartitsissutigineqarput. Aningaasaliissutinillu nikititerilluni nutaamik umiarsualivimmik annerusumik sananissamut misissueqqaarnissamut artorneqartussaagaluarput. Itigartitsinerlu Jens B. Frederiksenimit ugguarineqarpoq. Containereqarfimmillu angisuumik pisariaqartoqarpoq.

- Kikkut tamarmik igalaaq ammarlugu takusinnaavaat umiarsuarpassuit uninngaannartut tulannissaminut inissaqaratik, taamaammat Nuuk eqqarsaatigalugu pisariaqarluinnarpoq, oqarpoq.

Aalajangiinissaq ajornanngeqippat suliatik naammaginartumik ingerlassimanerai aperigatsigu ima akivoq:

- Aningaasaqarnermut ataatsimiitsitaliamut paasissutissanik tunniussinermik periuseq qangali atorneqartoq atorlugu sulisimavugut, paasissutissanillu amigartoqarpat aperineqarnissamut piareersimavunga, Jens B. Frederiksen oqarpoq.

Aningaasaqarnermut ataatsimiititaliamit itigartitsineq tunngavilersorneqarpoq, suliat allanit aningaasaliinernik nutsiterineq naammaginanngitsoq. Tamannalu ilumuunnginnerarpaa:

- Ukua aningaasat pissarsiarineqarput suliassat qangali naammassinikut. Assersuutigalugu mittarfimmut Ilulissanut tunngasut tassani misissueqqissaarneq pillugu qanga aningaasaliisoqarsimavoq. Taakkuli 2005-mip missaani naammassineqarsimavoq, massakkulli byggeregnskabimilu takuneqarsinnaavoq aningaasanik sinneqartooruteqartut, taakkuli maannakkut inassutigaarput allanut atorneqarnissaat.

Assersuutigisaa Ilulissani aningaasat atunngitsuukkat nuutinniakkat 900.000 koruuniupput.
Jens B. Frederiksen naqissuserpaa suliaq suli naammassinngitsoq, paasissutissanillu allanik peqalerami neriuppoq aningaasaqarnermut ataatsimiititaliap itigartitsissutertik nalilersoqqissagaat.

Aningaasanik nikerartitsinermit pisassat saniatigut Nuummi umiarsualiviliornissamut atugassat aningaasat Kommuneqarfik Sermersooq, Royal Arctic Line Aalborg havnilu aningaasaleeqataassapput.