Umiarsualiviit salliutinneqarsimanngillat

Umiarsualiviit sinerissamiittut amerlanersaat aserfallassimapput iluarsartuunneqartariaqavillutillu, tamanna angallannermut sanaartornerlu naalakkersuisuugallartup Hans Enoksen-ip nassuerutigaa. Umiarsualivinnilli iluarsartuussineq aqagu aallartinneqarsinnaanngilaq akisoqimmat inuiaqatigiinnilu suliassat tulleriiaakkat sallersarinngimmassuk. Umiarsualiviit aaqqissuunnissaat naalakkersuisunngorumaartussat tassa suliassarigaat Hans Enoksen oqarpoq.

- Misissuinerit aallaavigalugit aningaasaliinet aaqqinneqartarnikuupput, kisianni malunnarpoq paasinarsillunilu aningaasaliissutaasartut amgarluinnaqqissaalersimasut, taamaammat Inatsisartunngortussat Naalakkersuisuinngortussallu annertuumik tassani suliassaqarput. Massakullu annerusumik alloriarsinnaannggilagut qinersisoqartussaanera pissutigalugu.

Manna tikillugu Naalakkersuisut umiarsualiveqarnermik salliutitsisimanngillat.

- Oqaatigissavara sooruna inuiaqatigiinni tulleriaarinermi suliassaqarfiit pingaaruteqartut pisariaqartinneqartorpassuillu allat aamma qissimigaarneqarlutillu suliarineqarnikuummata. Illussaqarniarneq, isumaginninneq, meeqqeriviit utoqqaat illui, atuarfinnik iluarsartuussinerit allarpassuillu tulleriaarneqarsimapput aamma taakkunaniissimalluni umiarsualiveqarneq salliutinneqarsimanngilaq. Kisianni ilumoorpoq pingaartumik Nuummi Sisimiuni Ilulissanilu umiarsualiviit piaartumik aaqqiiffigineqartariaqaraluartut aningaasat pigineqartuuppata, Hans Enoksen oqarpoq.

Aningaasat allatut pissarsiariniarneqarsinnaasut oqarpoq.

- Allatut ajornartumik immaqa avataaninngaanniit aningaasalersuinissat aqqutissiuunneqartariaqassapput, tassa atorniarnikkut.

Aningaasat nunatta karsianit aaneqassappata tamanna inuiaqatigiinni annertuunik pisariaqavissunillu kaluaasoqarnissaa naatsorsuutigineqartariaqartoq Hans Enoksen oqarpoq.

- Sanaartugassat allallu pisariaqartinneqartut kinguartiterneqartariaqassapput.

Umiarsualiviit iluarsartuussinissamik pisariaqartitsinerat pillugu nalunaarusiami ilaatigut eqqaaneqarpoq umiarsualivinnik tamanik iluarsaassinissaq katillugu 600 million koruunit missaanni naleqassasoq.