Umiarsualiviit mittarfiillu matuneqarput

Umiarsualiviit mittarfiillu matuneqarnerannut pissutaavoq qaartartumeerisut qeqertamiit qimaaniarsarinissaat pingitsoorniaratsigu, Naalakkersuisut oqaaseqartartuat oqarpoq.

- Mallorcami umiarsualivinniit, marinaniit mittarfinniillu aallarnissat tamarmik taamaatinneqarput, oqaaseqartartoq nangippoq.

Politiit isumaqarput immikkoorniaqatigiinnut soqutigittaaqisunut eqimattanut ETA-mut ilaasortat Mallorcami qaartartumeerisuusut, ilimagaallu Spaniap avannarpasissuani illoqarfimmi Burgosimi pingasunngormat aamma taakku qaartartumeerisuusut, Burgosimi inuit 46-t ikiligaapput.

ETA aqagu ukiunik 50-inngortorsiortussaavoq. Spaniami tusagassiorfiit arlallit oqarnerat naapertorlugu biilinik qaartartortalinnik ETA Spaniamukartitsiniarpoq, ullorsiornerminut atatillugu.

Danskit 1200-t 1400-llu akornanniittut Mallorcami maanna aasarsiorput. Angalatitsivimmi Star Tourimi tuniniaanermut pisortap, Stig Ellingip, oqarnera naapertorlugu, qaartartumeerineq politeeqarfiup qanittuani pivoq, Mallorcap pigisaata Palmanovap qanittuani, Star Tourimiillu tamanna atorneqartarpoq. Tuniniaanermulli pisortap oqarnera naapertorlugu, danskinik ajoqusertoqanngilaq, aamma feeriaminnik taamaatitsiinnarusuttunik ilisimasaqannginnerarpoq.

Qaartartumeerineq illussaarsuup Mariventip angasinngisaani pivoq, Spaniami kunngikkormiut tamaani maanna aasarsiorput.