Umiarsualiviit aserfallattut
Sinerissami umiarsualiaviit pisoqalisimasut aserfallassimasullu tamakkissagutsigutigit ukiumut 15 million koruunit naammanngillat. Taama naliliivoq nunatsinni umiarsuliveqarfinnut pisortaaneq John Rasmussen. Ippassaq tusagassiaraarput Nuup umiarsualivia mikivallaalersimasoq ulorianartorsiutaasinnaasumillu aserfallalertorsimasoq.
Nuummiinnaanngitsoq aammali siniariammi umiarsualiviit arlallit iluarsartuunneqarnissaat pisariaqalivikkaluartoq John Rasmussen oqarpoq.
- Sinerissami umiarsualiaviit ataavartumik aserfallatsaalineqarnerat iluarsartuunneqartarnerallu ajornartorsiutaanerpaapput, umiarsualivinni amerlasuuni aqqutit atorneqarnerpaat putoqartitilernikuupput assigiinngitsutigullu aaqqissugassarpassuaqarpoq, John Rasmussen umiarsualiveqarfinnut tamanut pisortaaneq oqarpoq.
John Rasmussen aamma oqarpoq sinerissami umiarsualivinnik iluarsartuussinissaq massakkut pisariaqarluinnalersimasoq sillimanissakkut piumasaqaatit eqqarsaatigalugit. Timmisartoqarfiit piorsarneqarput taakkununnga umiarsualiviit aamma malinnaatinneqartariaqaraluarput angallassinikkut assartuinikkullu ataqatigiimmata, John Rasmussen oqarpoq. Qinikkat kaammattorpai piaartumik iliuuseqarniaqqullugit.
Qaqortumi umiarsualiviup pisortaa Efraim Tittussen tapersiivoq oqaluttuarporlu Qaqortumi umiarsualivik aamma mikivallaalersimasoq, ukiuni kingullerni nassiussat amerliartornerat iluatigalugu.
- Umiarsualiviup qaava aamma qulloortiternikuuvoq, containerinullu truckersuit 60 tonsinit oqimaannerusut containerinik usisartut oqimaannermik, umiarsualiviup qaavanut aamma aserfallatsitsilertortarput. Qaqortup umiarsualiviani sissiukkap talittarfiusup aamma kiviartuaarnera malunnartoq Efraim Tittusen oqarpoq, sillimanissarlu eqqarsaatigalugu tamanna naleqqukkunnaavissoq oqarluni. Qaqortumi umiarsualivik ukiut pingasut matuma siornagut iluarsaanneqarpoq maannamut naammassineqanngitsumik, Efraim Tittusen oqarpoq.
Nunatsinni umiarsualiveqarfinnik aserfalllatsaaliinermut Namminersornerullutik Oqartussat ukiumut 15 million koruunit missaanni aningaasaliissuteqartarput.
