Umiarsualiinissaq immaqa pisariaqanngilaq

Naalagaaffiit Peqatigiit Libanonimi sakkutuuliussassaat piariilivipput.

Nunat assigiinngitsut sakkutuuliissapput. Danmarkimit sakkutuut umiarsui pingasut peqataatinneqarnissaat danskit illersornissamut ataatsimiititaliaanit akuersissutigineqareersoq paasinarsivoq danskit umiarsualiussaassa peqataatinneqarnissaat immaqa pisariaqanngitsoq.

Naalagaaffiit Peqatigiit tyskit umiarsuliussassanik nakkutiginnittussatut aalajangeqqammerpaat. Tyskillu maanna nunat sorliit umiarsualiissanersut misissuileruttorput.

Danskit nunanut allanut ministeriat Per Stig Møller ima oqarpoq:

- Naalagaaffiit Peqatigiinni nunat ilaasortaatitaqartut umiarsuliiniarlutik neqerooruteqartarput. Neqeroortoqareeraangat nuna sorleq nakkutiginnittussanersoq aalajangertoqartarpoq. Nunarlu qinerneqartoq neqeroorutinik misissuilluni aallartittarpoq, Per Stig Møller oqarpoq.

Danskit umiarsualiiniarlutik neqeroorutaat tyskinit atorneqarusussanngippat nunami sakkutuuliinissaq danskinit neqeroorutigineqarusunngilaq.

- Naalagaaffiit Peqatigiinni ilaasortaanitta kingunerisaanik sakkutuugut sumi tamaniipput; Kosovomi, Irakimi Afghanistanimilu. Sakkutuuliussagut naammagigallaratsigit sakkutuuleeqqikkusunngilagut, danskit nunanut allanut ministeriat taama oqarpoq.