Umiarsuaatillit: Quleruaata putoqarnera ajoqutaavoq
- Aalisariutip sinaa assersuuteqanngitsoq upalungaarsimanissamut inatsisinik unioqqutitsineruvoq, sunaaffalumi ajunaarnermik kinguneqartussaq, ulluinnarni aqutsisoq Einar Halsson oqarpoq.
Aalisariutaatileqatigiinni ulluinnarni aqutsisup nassuiaanera naapertorlugu ajunaartoqanngilaattaani aalisariut amutsivimmiissimavoq, suliarineqarneratalu nalaani aalisariutip quleruaa kukkusoqarneratigut ilanngarneqarsimalluni.
Einar Halssonip oqaatigaa aalisariutip quleruaanik taamatut ilanngaasarneq nunani allani nalinginnaasuuvoq, qassutinimmi issoraanermut atugassiaasarmat. Taamaammat Imarsiornermi qullersaqarfiup politiinut tunniussinera puaatsoorutigaa.
- Ajunaartoqarnissaata tungaanut ukiup affaa sioqqullugu aalisariut Polenimut amutikkiartorpoq nutarsarneqarlunilu, suliarineqarneranilu qaleruaa ilanngarneqarmat kukkuneq tassani pinngorpoq. Taamanili naliliinerput naapertorlugu aalisariutip quleruaa 90 centimeterinik silitsigisumik ilanngarneqarmat assuarnartoqarsorinngilarput, tassami nunani allani tamanna nalinginnaasuummat. Taamaammat politiinut suliassanngortinneqarnerput tupaallaatigeqaara, Einar Halsson oqarpoq.
Politiinulli suliassanngortinneqarneq Einar Halssonip itisilerusunngilaa, alianartumilli pisoqarsimanera ajuusaarutiginerarlugu. East Greenland Codfish-ili sinnerlugu oqaaseqarnermini aalisariutip quleruaani ammaneq maanna assersorneqalernerarpaa, aalisariummilu sulisut ilinniartinneqartalersimanerat, aalisariullu suliffittut nalilersorneqartalersimanera Einar Halssonip unnersiutigaa.
- Aalisariutitsinni ajunaartoqarnera assorsuaq ajuusaarutigaara. Tassami umiarsuarmi toqusoqarneranik misigisaq avaanngunarluinnartuuvoq. Taamanimi ajunaartoqarmat nangitinnerit imaaginnavissimapput, tassami inuttaq ajunaartoq imarsiornermik misilittagaqanngilaq, silarlulluni, tassalu aalisariutip quleruaani ammaneqarluni, Einar Halsson, East Greenland Codfishimi ulluinnarni aqutsisoq taama oqarpoq.
Imarsiornermut qullersaqarfiup aalisariutaatileqatigiinnik politiinut suliassanngortitsinera unnerluutiginninnermik kinguneqassanersoq Nunatta Politiivisa maanna nalilersuiffigileruttorpaat.
