Umiarsuaatilik peqqinnissaqarfimmut millionilippassuarnik aningaasaliisut
Kuupik Kleist allappoq naalagaaffeqatigiit, tassa kalaallit ilanngulluta, angut imaannaanngitsoq annaagipput, Mærsk Mc-Kinney Møllerillu nunatta ineriartorneranut soqutigisaqarluartuusimanera qujamasuutigalugu.
Nunatsinni peqqissutsimut tunngasut angutip taassuma sunniuteqarfigilluarsimavai, aningaasaateqarfiatalu tapiissutigisartagi iluaqutaasimaqalutik.
Ilaatigummi Nuummi Sanami nakorsiartarfik nutaaq, pilattaasarfiup nutarterneqarnera, aamma tassanngaannartumik passussisarfittaassamut 140 millionit koruuninik Mærsk Mc-Kinney Møller aningaasaliisimavoq.
- A.P. Møllerip aningaasaliineratigut Dronning Ingridip Peqqissaavia nutarterneqarsinnaanngorsimavoq. Nunattami nammineq aningaasalerniassagaluarpagu piffissaq sivisunerujussuaq atorneqaqqaartariaqassagaluarmat, Peqqissutsimut Naalakkersuisoqarfimmi tusagassiinermut qullersap Ea Cecilie Aidt-ip ullumi taama oqaatigaa.
Nuummi nakorsiartarfittaaq siorna marsimi atoqqaarfissiorneqarpoq.
Aamma tassanngaannartumik passussisarfittaassami kræftimut misissuinermi atortorissaarutit nutaavissuit millioninik sisamanik akillit, Mærskip aningaasaliineratigut pissarsiarineqarsinnaasimapput. Tassanngaanartumillu passussisarfittaassarlu maanna sanaartorneqaleruttorpoq. Atortorissaarutillumi putuarannguit, qinnguartaatillu atorlugit DIH-mi pilattaanermi iluaqutaalereersimapput.
Mærsk Mc-Kinney Møllerip aningaasaateqarfia nunatsinni allatigut aamma iluaqutaasimagujoq:
Knud Rasmussenip Højskolia Sisimiuniittoq, ukiormanna ukiunik 50-inngortorsiorluni nalliuttorsiortussaq annertuumik nutarterniarneqalermat millioninik tallimanik Mærskikkunnit aningaasaliiffigineqarpoq.
