Umiarsuaatilik kilisaatillu naalagaa pineqaatissinneqarsinnaapput
Tamanna umiarsuaatillip kilisaatillu naalagaata ukiuni marlunni pineqaatissinneqarnerannik kinguneqarsinnaavoq.
- Angalanissamut akuersissummik peqarani avalattoqaqqusaanngilaq. Markusilu akuersissummik taamani peqanngilaq, Imarsiornermik Qullersaqarfimmi immikkut siunnersorti, Peter Lauridsen, oqarpoq.
Imarsiornermik Qullersaqarfiup qulaajaasartuisa nalunaarusiaat nutserlugu ima aallassimavoq:
- Umiarsuup angalanissamut akuersissutaa, ajunaartoqarnerani atuutinngilaq, piffissap akuersissuteqarfiusup iluani nakkutilliiffigineqarnissaa, decembarip 26-ani pisussaagaluartoq, pisimanngimmat.
Allatut oqaatigalugu, kilisaatip tulattarfik qimattussanngikkaluarpaa.
Tassalu Markusip malittarisassat malissimagaluarpagit, imaassinnaagaluarpoq, angut upernaaq manna maajimi aallarnermi ajunaartoq, suli ajunngissimassagaluartoq.
- Umiarsuit 20 bruttoregistertonsinit anginerit tamarmik angalanissamut akuersissuteqartussaapput, immikut siunnersorti oqarpoq, nassuiarlugulu, akuersissut takussutissiisoq, umiarsuup angalasinnaaneranut Imarsiornermik Qullersaqarfiup akuerisimagaa, Peter Lauridsen nassuiaavoq.
Tassalu erseqqinnerusumik oqaatigalugu, akuersissummik tunineqartigatik, umiarsuarmi pissutit assigiinngitsut aaqqinneqarsimanersut qulakkeerneqaqqaartariaqarpaat:
- Angalanissamut akuersissummik tunniussitinnani piumasarineqartarpoq, akuersissutit allat tamarmik pigineqarnissaat. Tassa nunamut sumut atanermut uppernarsaat, umiarsuup qanoq pisinnaassusianut uppernarsaat allarpassuillu naammasssineqareernersut qulakkeeqqaarlugit angalanissamut akuersissut tunniuneqartarpoq, taannalu kilisaatinut atatillugu ukiuni sisamani atuuttarpoq, piffissamili akunniliuttumi pinngitsoorani nakkutilliisoqartussaaavoq, Peter Lauridsen nassuiaavoq.
Tassalu piffissami akunniliuttumi Markusimi nakkutilliinisaq pisimanngilaq.
- Angalanissamut akuersissummi allassimavoq, akuersissut tamaallaat atuuttoq, piffissami akunniliuttumi nakkutilliisoqasssasoq aammalu radio ukiumoortumik misissorneqarsimassasoq, inatsisileritooq oqarpoq.
Taamaammat Peter Lauridsenip allaqquffisaqarsorinngilaa, kisianni suliassaq eqqartuussivimmut tunniullugu:
- Kingunerissagunarpaa, politiit qinnuigigigut, una suliassaq misissoqqullugu eqqartuussivimmullu apuuteqqullugu, Peter Lauridsen oqarpoq.
Tassalu naggaterpiaatigut kingunerisinnaavaa pillaatissiisoqartoq:
- Pineqaatississutip annerpaaafissaa ukiut marluupput. Taannalu malittarisassanik unioqqutitsisumut tussaaq. Tassalu umiarsuaatilik, umiarsuup naalagaa, imaluunniit taakkua marluullutik pineqaatissinneqarsinnaapput, Imarsiornermik Qullersaqarfimmi imikkut siunnersorti Peter Lauridsen oqarpoq.
