Umiarsuaatileqatigiit 50.000-it koruuninik akiliisussanngortinneqarput
Umiarsuaatileqatigiiffillu imaani isumannaallisaanermi malittarisassanik unioqqutitsisimasutut 50.000-it koruuninik akiliisussanngortinneqarpoq.
TV2/Fynip nittartagaani ullumi taama allaaserinnittoqarpoq.
Aquttoq 47-nik ukiulik umarsuarmilu saqisuaqqatut ilinniartoq 18-inik ukiulik Orasilamit umiatsiaaqqamik slangimik uuliamut atortakkamik nassarlutik nunamukartillutik ajunaarput.
Imarsiornermut Qullersaqarfiup umiarsuaatillit umiartornermi isumannaallisaanermik unioqqutitsisuunerarpai politiinullu nalunaarutigalugit.
Imarsiornermut Qullersaqarfiup ajunaarneq misissuiffigereerpaa ilaatigullu oqaatigalugu, umiarsuaatileqatigiit isumannaallisaanermut periaasiat eqqortumik atuutsinneqanngitsoq, pisariaqartinneqartunik atortunik atuisoqanngitsoq ajunaartullu marluullutik puttaquteqarsimanngitsut imaluunnit annanniutinik atallaarsuaqarsimanngitsut.
Umiarsuaatillit 50.000-it koruuninik akiliisussanngortitaanerat suliatigut peqatigiiffiup 3F-ip naammaginngilaa:
- Akiliisitsineq sunniuteqassappat amerlanerusunik akiligassiisoqartariaqarpoq, 3F-ip pisortaa TV2/Fynimut oqarpoq.
