Umiarsuaatileqatigiiffiup coronamik tunillatsittoqareernerani upalungaarsimaneq nalinginnaasoq atuleqqikkaa
Royal Arctic Line Danmarkimi umiarsuaatimini inuttap ataatsip coronavirusimik tunillatsissimanera pillugu sapaatiummat ilisimatinneqarpoq.
Umiarsuaatileqatigiiffiup upalungaarsimaneq annertusisaq atulerpaa, taamaammat sulisut sorliit tunillatsissimasinnaanerat paasiniarlugu nukissat amerlanerusut atorneqarput.
Umiarsuaatileqatigiiffik tusagassiuutinut nalunaarummi taama paasissutissiivoq.
AAMMA ATUARUK Royal Arctic Linemi inuttaq coronavirusimik tunillatsissimasoq
Umiarsuarmi inuttap allap ataasiinnaap misissorneqarnissaa kisimi pisariaqartoq oqartussat nalilerpaat. Misissorneqarneranilu tunillatsissimanngitsoq paasineqarpoq, taamaammat umiarsuaatileqatigiiffiup coronamut upalungaarsimanini nalinginnaasoq uterfigeqqippaa, pisortap tullia, Aviâja Lyberth Lennert KNR-imut itisiliivoq.
Tassa imaappoq suliffeqarfiup oqartussat coronap kipiluttunarnerani innersuussutaat nalinginnaasut malippai. Tamatumani umiarsuaatileqatigiiffiup nunami sulisuisa umiarsuaanilu sulisut avissaaqqatinneqarnerat ilaavoq.
RAL-imi suliusut tunillatsinnissamut ilimanaateqartumiittut
Royal Arctic Linep imarsiortui sumiiffinnut inuiaqatigiinni tuniluuttoqarfiusunut assigiinngitsunut amerlasuunullu angalasartut, umiarsuaatileqatigiiffik erseqqissaavoq.
- Taamaammat umiartortuvut aamma tunillanneqaratarsinnaapput, Nunattalu pilersornerata attatiinnarnissaa pillugu taama atugassaqartitaallutik sulipput.
- Tamanna pissutigalugu Royal Arctic Line COVID19-imut upalungaarsimajuarpoq, nappaammullu ersiutaasinnaasut inuttanit eqqumaffigineqaqqissaarlutik, umiarsuaatileqatigiiffik nalunaarummi allappoq, nangillunilu:
- Tamatuma saniatigut aamma umiarsuit Nunatsinni umiarsualivinnut aqqusaarnerinut atatillugu inuttat inunnut allanut qanillinaveersaarnissaannut tunngatillugu umiarsuarni killilersuisoqarpoq.
Umiarsuarmi Danmarkimiittumi, inuttap tunillanneqartup ilaaffigisimasaani, upalungaarsimaniarneq ulluni makkunani pissusissamisoortumik immikkut annertusineqarpoq, ersiutaasinnaasullu annikikkaluartut tamaasa iliuuseqarfigineqassapput. Taamaakkaluartoq umiarsuarmi sulineq pisarnertut ingerlavoq.
