Umiarsuaatileqatigiiffimmik pisinissaminnut isumalluarput

novembarip 03-at 2005 15:17

Arctic Umiaq Linep tuniniarneqarnera naammassilerpoq, tuninissaalu naalakkersuisut ullumi akuersissutigereermassuk inatsisartut aningaasaqarnermut ataatsimiititaliaat isummertussanit kiserngoruppoq. Pisiniarnertillu naammagisimaarlugu Arctic Travel Groupip siulersuisuini siulittaasoq Søren Rasmussen naliliivoq.

- Isumaqarpunga pisillualerluta, taamaanngikkaluarpammi aamma isumaqatigiissuteqarnavianngikkaluarpugut. Arctic Travel Groupip siulersuisuini siulittaasoq Søren Rasmussen taama oqarpoq.

Arctic Travel Groupimik piginnittut takornarialerisuummata angallassinermik nalinginnaasumik tigusiniarnerat nunatsinni ilaatigut ernumagineqarsimavoq, takornariat salliutinneqassasoralugit. Ernumasoqassanngitsorli erseqqissaatigaat.

- Innuttaasut allanngortoqarneranik malugisaqangaarnavianngillat, Arctic Umiaq Linep pilersaarutigisimasaanit allaanerungaartoqanngimmat. Ullumikkut angallassisarnerit aallaaviussapput, taakkuummatami aningaasarsiorfiusartut. Taakku pereerpata takornariartitsineq aatsaat tullinnguutissaaq. Søren Rasmussen erseqqissaavoq.

Arctic Travel Groupili apriilimit september-oktoberip tungaannaanut angallassisassaaq.

- Ukiukkut angalasartut ikippallaarmata ukiuunerani taamaallaat angallassisassaavut. Tamanna siunertaajuarsimavoq, soorlu aamma Arctic Umiaq Linep tamanna pilersaarutigilersimagaluaraa. Siulittaasoq erseqqissaavoq.

Kikkummi sulisorineqassappat ?

- Kalaallit sapinngisamik amerlanerpaat sulisorineqassapput, sulisooreersullu sapinngisamik tigummiinnarneqassallutik. Naalakkersuisunut aamma isumaqatigiissutaavoq, takornarianik sullissinermut tunngasunik kalaallinik ilinniartitsissasugut. Sulisut pilersaarutinik aamma saqqummiussivigineqassapput. Søren Rasmussen erseqqissaavoq.

Ukiuunerani Kalaallit Nunaanni angallassisoqannginnerani nunani allani angallassisarnissaq pilersaarutaavoq, isumaqatigiinniarnerillu arlallit isumalluarnartoqaqisut ingerlanneqartut siulersuisut siulittaasuata erseqqissaatigaa.

- Maanna annerusumik oqaaseqarsinnaanngikkallarpunga, Inatsisartummi aningaasaqarnermut ataatsimiititaliaa pisinissatsinnut aamma akuerseqqaartussaammat. Søren Rasmussen erseqqissaavoq.

Arctic Travel Group nunatsinni imaatigut angallassinerup saniatigut timmisartukkut aamma angallassisalerusuppoq, assersuutigalugu Kangerlussuarmut umiarsuartitseriarluni Danmarkimut timmisartuussisalernissaq takorloorneqarluni. Aammali Air Greenlandip suleqatiserineqarsinnaanera eqqarsaatigineqarpoq. Søren Rasmussenip siunissaq ungasinnerusoq eqqarsaatigalugu aamma takorloorpaa, Islandimit nunatsinni illoqarfinnut pingaarutilinnut uterlugulu timmisartuussisalernissartik.

Arctic Travel Groupip Arctic Umiaq Linemik pisiniarnera inatsisartut aningaasaqarnermut ataatsimiititaliaata akuerissaguniuk apriilip aallaqqaataanit tigussavaa.