Umiarsuaatileqatigiiffik taarseeqqussummik eqqartuussivilersuunneqarpoq
Ataataasoq isumaqarpoq, umiarsuaatillit M.H. Simonsenikkut Svendborgimeersut ernermi ajunaarneranut akisussaatinneqartariaqartut. Ataataasup oqaatigaa umiarsuaatileqatigiit ajutoornermut atatillugu sakkortuumik akisussaassuseqanngitsumik pissusilersorsimasut. Aviisimi Fyens Stiftstidendemi taama allaaserinnittoqarpoq.
47-nik ukiulik Michael Kryger Sørensen Saarlup avataatungaani ajunaarpoq, 18-inik ukiulik Jon Sandholm aapparalugu taartumi uuliamut slangi, uuliamit assartuummit Orasilamit umiatsiamik nunaliaanniartillugu.
Imarsiornermut Qullersaqarfiup umiarsuaatillit umiartornermi isumannaallisaanermik unioqqutitsinerarlugit aamma politiinut nalunaarutigereerpai. Imarsiornermut Qullersaqarfiup ajunaarneq misissuiffigereerpaa ilaatigullu oqaatigalugu, umiarsuaatileqatigiit isumannaallisaanermut periaasiat eqqortumik atuutsinneqanngitsoq, pisariaqartinneqartunik atortunik atuisoqanngitsoq ajunaartullu marluullutik puttaquteqarsimanngitsut imaluunnit annanniutinik atallaarsuaqarsimanngitsut.