Umiarsuaaraq pingasulik ilisimasassarsiorluni aallaqqiinnaqaaq

Ilisimasassarsiorneq Statens Naturhistoriske Museumimit siuttuuffigineqarpoq, ilimatusartullu Tuluit Nunaanneersut, USA-meersut, Canadameersut Tysklandimeersullu umiarsuaaqqamut aamma ilaapput.

Activ Københavnimi Nordatlantens Bryggemit Nunatsinni sineriaat ilisimassarsiorfigineqannginnersaannut sapaatiummat aallarpoq, tassalu Tunup kujataanut, silap pissusianik ilisimatusartorpassuit ilisimatusarfigissallugu pilerigeqisaannut.

- Tunup kujataanut angalanissamut periarfissinneqarluni assut nuannerpoq - sikoqarpallaannginnissaalu neriuutigaarput. Sikumi tassani naalagaavoq. Tamannalumi pissutigalugu tikinnissaa assut pissanganarpoq - ukiummi ingerlanerini qassiit tassunngarniartarsimagaluarput Kalaallit Nunaatalu sineriarujussuani ilisimatusarfigineqannginnerpaajuvoq, ilisimasassarsiortut pisortaat professor Kurt H. Kjær Statens Naturhistoriske Museumimeersoq taama oqarpoq.

Sermersuup aakkiartornerata imaviillu siunissami qaffasissusaasa allannguuteqarnissaasa paasisaqarfiginissaat ilisimasassarsiornermi siunertarineqarpoq. Iisimatuut angalanerminni kangerlunni uuttortaassapput kiisalu aamma kangerlunni tatsinilu sermermi qilleralutik misiligutissanik katersissallutik. Misiligutissatut katersorneqartut sermersuup siornatigut aakkiartortarsimaneranut paasissutissanik pissarsiffigineqarsinnaassapput.

Ilisimasassarsiortut septembarimi angerlaqqissangatinneqarput.