Umiarsuaaraq alapernaarsuut Danmarkimiit Hansip Qeqertaanukartinneqalerpoq

Danmark umiarsuaaqqamik alapernaarsuummik qaammatip tulliani Hansip Qeqertaanukartitsinialerpoq, taama allappoq aviisi Berlingske Tidende.

Taama iliortoqarniarpoq, Danmarkip ersersinniarmagu, qeqertannguaq taanna Danmarkimut atammat. Canadap Danmarkillu ukiorpassuit saqitsaassutigaat Hansip Qeqertaa nunamut sorlermut atanersoq.

Canadap Illersornissamut ministeria Danmark ilisimateqqaarnagu sapaatip akunnerani kingullermi qeqertannguamiippoq. Tamanna Danmarkimiit akerlilerneqarpoq, maannalu danskit sakkutooqarfianniit tassa takutinniarneqalerpoq, qeqertaq canadamiunit oqartussaaffigineqanngitsoq.

Nunanut Allanut ministereqarfiup Illersornissamut ministereqarfik pisoq qassiiliutigeqqunagu siusinnerusukkut siunnersoraluarpaa, umiarsuaararli alapernaarsuut atorlugu Danmark maanna iliuuseqarnialerpoq, uppernarsiniarlugu qeqertaq Danmarkimut atammat.

Hansip Qeqertaa ukiuni kingullerni 15-ini tallimariarluni sakkutooqarfimmiit tikeraarneqartareerpoq, pinerit tamaasa erfalasulertoqartarluni. Ukiunili kingullerni tikeraartarnerit akulikillisimapput, danskit umiartortut erfalasuliinnaratik aamma canadamiunut tikilluaqqusillutik imigassallertalersimallutik.

Hansip Qeqertaa, avanersuarmiutoorlugu Tartupaluk, 1988-imi, ’95-imi, 2001-imi, 2002-mi, 2003-mi aammalu tassa ukiormanna danskinit tikeraarneqarsimavoq.

Nunanut allanut ministereqarfiup aallartitaa, Peter Taksøe-Jensen, erseqqissaavoq, isumaqatigiinniarnissanut Danmark piareersimasoq.

- Isumaqatigiinniartoqarpat aatsaat saqitsaakkunnaartoqassaaq, aallartitaq oqarpoq.