Ulussaarsuit tulleriiaaginnavillutik USA-p sineriaanut annguttarnissaat Floridami silasiortut ilimasaarutigaat.
Caribiap USA-llu sineriaanut ulussaarsuit 2006-imi annguttussat quliniussaat ilimagineqarpoq. Taakkunannga sisamat arfinillilluunniit sakkortoorujussuullutik atuunnissaat USA-mi nuna tamakkerlugu ulussaarsuarnik nakkutilliisoqarfimmi silasiortut ilimasaarutigaat.
Ulussaarsuit juunip aallaqqaataanit USA-p sineriaanut annguttussatut ilimagineqartut ukiunut siuliinut naleqqiullutik sakkortunerunissaat silasiortunit eqqoriarneqarpoq. Ulussaarsuilli ukioq manna USA-p sineriaanut annguttussatut ilimagineqartut siorna anorersuarujussuarnut 28-nut naleqqiullutik sakkukinnerunissaat eqqoriarneqarpoq. Siorna anorersuarujussuarnit 28-usunit 15-t ulussaarsuannguummata USA-mi 1.300-t ajunaarput.
Anorersuarujussuit 13-t 16-illu akornanniittut sakkortoorujussuussammata arlaannik atserneqarnissaat silasiortunit eqqoriarneqarpoq, taakkunanngalu qulit ulussaarsuannguunnissaat aamma eqqoriarneqarluni.