Ulussaarsuaq Alberto Floridamut anngutilerpoq
Ulussaarsuaq USA-mi maanna atuuttoq, Alberto, Floridap sineriaanut anngutsinnagu, Floridap nunataani qaqqaqarpianngitsumi innuttaasut tusindtilippassuit qimagussorneqarnissaat Floridami guvernørip piumasaraa. Alberto Floridap sineriaanut ullaap tungaa anngutissangatinneqarpoq.
Inuit 21.000-t angerlarsimaffimminniit qimaaqquneqarput, inuillu upalungaarsimanissaat angerlarsimaffitillu aseruatiterpallaaqqunagit arlaannik iliuuseqarnissaat silasiortut piumasaraat. TV-qarfissuaq CNN ullaaq manna taama ilisimatitsivoq.
Ulussaarsuaq Alberto sapaatiummat pitoraappoq, USA-mi ulussaarsuit taamaalilluni ukioq manna aallarnerlugillusooq. Anorersuup nalunaaquttap akunneranut kilometerinik 70-nik sukkassuseqarluni Cubap kippasissortaa aqqusaarpaa, sialummilli malitseqarnera ajornartorsiortitsineruvoq.
Cubap kippasissuani centimeterit 50-it sinnerlugit sapaatiummat siallerpoq, qarsutsinermik kinguneqartumik.
Juunip ulluisa aallaqqaataata missaaniit novembarip ulluisa 30-iata missaata tungaanut USA-mi ulussaarsuarfiusarpoq. Amerikamiut oqartussaasuisa ilimagaat ulussaarsuit ikinnerpaamik 13-it aasaq manna atuutissasut. Ulussaarsuit 28-it siorna atuupput, aatsaat taama amerlatigalutik.
