Ulrik Rosing toquvoq

oktobarip 02-at 2006 15:35

Ilinniartitsisoq radiukkullu aallakaatitassiortartoq Ulrik Rosing sivisuumik napparsimareerluni tallimanngormat septemberip 29-anni toquvoq, 77-inik ukioqarluni.

Ulrik Rosing, Uularik, Appani inunngorpoq ukioq 1928, juulliaraq aqaguttoq.

Poqersuugami ilinniaqqinnissaminut piukkunneqarluni ilinniariartortinneqarpoq, taamalu efterskoli, højskoli seminarialu aqqusaareerlugit ilinniartitsisunngorpoq.

Inuutsaruttorluni nappaassuarmit TB-mit eqqorneqarpoq, pilatserujussuartariaqarlunilu, timimilumi sanngiillinera inuunermi sinnerani malugisaannarpaa.

Nappaat qaangeramiuk meeqqat atuarfiannut ilinniartitsisutut uterpoq, kingornalu aamma Nuummi realskolimi ilinniartitsisuulluni, pingaartumik kalaallit oqaasii, iternga tikillugu ilikkarsimasani, ilinniartitsissutigisarlugit.

Uulariup Nuummi ilinniartitsisuunerata nalaani Kalaallit Nunaata Radioa aallartippoq, aallakaatitassiornerlu soqutigigamiuk KNR-imi 1963-imi atorfinippoq.

Aallakaatitassiai inuiaqatigiinnut tunngasut inunnillu oqaloqateqartarneri amerlasoorpassuit maanna KNR-imi pigineqarput, taamaalillutalu Uulariup nipaa qaqugorsuarmut tusartassavarput.

Uularik inuiaqatigiinni pissutsinik soqutiginnittuugami malinnaajuarpoq, Kalaallit Nunaallu pillugu ataatsimiititap, G-60-imik taaneqartartup, suliani naammassilerai, paasinarsimmallu sumi inunngorsimaneq najoqqutaralugu akissarsiaqartitsineq atulersinniarneqalersoq, partiimik tassunga akerliusumik aallartitseqataavoq, taaneqartumik ”Inuit Partiiat”.

Uularik peqqiilliortarnini pissutigalugu Kalaallit Nunaata Radioanit siusinaarluni soraarninngorpoq 1978-imi. Taamaakkaluartoq kingorna pisinnaatilluni aallakaatitassiortuartarpoq.

Inuiaqatigiinnik soqutiginninnini ingerlatiinnarpa, tamannalu Atuagagdliutini Sermitsiamilu allagarisartakkamigut qanittoq allaat tikillugu takutittarpaa.

Taamatuttaaq erinarsorneq nuannarisuugamiuk ”Nuummi Angutit Erinarsoqatigiit” pilersinneqarmata pilersitseqataavoq.

Uularimmik suleqatiginnittuusimasugut eqqaamajuassavarput inuttut ilakkuminartutut ikinngutaalluartutullu, aammali isummeruni isummiussaminik aalajangiussinikkaatut, tunngavissarsiorluanngikkaanni allanngortitassaanngiusartartunik.

Ulrik Rosing, Uularik, akornatsinniikkunnaarpoq, puigorneqarnavianngilarli.

Eqqaaneqarnera ataqqinartuuli!

Ulrik Rosing Nuummi Hans Egedip Oqaluffianiit sisamanngorpat oktoberip tallimaanni nalunaaqqutaq ataasimut ilisaassaaq.