Ulorianannginnersoq Canadamiut qulakkeerumavaat

Nunani issittuni uuliamik maqisoortoqarneratigut ulorianartorsiortitsisinnaanerit Canadami ulluni kingullerni sammineqartorujussuupput. Canadami aviisi ullormut saqqummersartoq Globe and Mail ullumi qupperneq ataaseq atorlugu allappoq Kalaallit Nunaata kitaani qillerinissat Canadamut ulorianaateqarluinnartut.

Yukon sinnerlugu inatsisartunut ilaasortaq Larry Bagnell aviisimut oqaaseqarpoq Kalaallit Nunaata eqqaani uuliamik maqisoortoqarpat tamanna Nunavuup Paggivittallu ilarujussuanut kinguneqarnerlussinnaasoq.

Aviisi amma allappoq Canadap avatangiisinut ministeriata Jim Prenticep neriorsuutigigaa juunip aallartinnerani avatangiisinut ministerinik allanik ataatsimeeqateqaleruni Kalaallit Nunaanni uuliasiornermut pilersaarutip akisussaassuseqarpaluttumik inatsisiliuunneqarnissaa pillugu Kalaallit Nunaannit qularnaveeqqusiissutinik qinnuteqarniarluni.

Jim Prentice oqarpoq nunani issittuni naalagaaffiit tamarmiullutik nukissiuutitigut ineriartortitsineq pillugu malittarisassat sukannernerpaat ataatsimoorlutik akisussaaffigigaat aammalu nunat Canadap sanilerisaasa malittarisassat taakkua maleruartariaqaraat.

Avatangiisit pillugit suliniaqatigiiffik World Wildlife Fund tusagassiuutitigut oqaaseqarpoq uuliamik qillerinissanut akuersissuteqarnerit Kalaallit Nunaanni tuaviuussaavallaartut.

Marianne Stenbækip Canadamiit taama ilanngutassiivoq.