'Uloriananngilluinnarpoq'
Politeerpaalussuit 19-nik ukiulimmik ujaasitinniarlugit aallartinneqarnerisa nalaanni radio-kkut tv-kkullu toqutsisumut navianarluinnartumut mianersoqqussutit imaaginnavipput. Kisiannili ujarneqartoq nammineerluni unnuap qeqqanngitsorluunniit paarineqarfimminut uterpoq, tusagassiutiniillu oqaluttuarineqarpoq innuttaasut politiillu maanna eqqisisinnaanngortut.
Risskovimi Aarhusip eqqaaniittumi tarnikkut nappaatilinnut napparsimaviup ajuusaarutigaa, qaammatit marluk ingerlanerinnaanni angut taanna appassaanik qimaasinnaammat - tamatumunnakkut sulisunik marlunnik paarsisoqarluni napparsimavimmiit aneertilluni qimaavoq - kisiannili erseqqissaatigineqarpoq pisariaqanngilluinnartumik aarlerisaarisoqarluni mianersoqqussuteqartoqarsimasoq.
- Paasisinnaalluarpara toqutsisimasumik qimaasoqarsimatillugu annilaangasoqartarnera. Kisianni puigorneqartarpoq napparsimasuutigineqartup maannakkorpiaq issusaa pinerluuteqarnerlu qanga pisimanersoq. Napparsimavallaartut ulorianarnerpaallu aneertinngisaannarpagut, peqqissaasuuneq Mette Daae Krøyer Jyllandspostenimut oqarpoq.
- Napparsimasuutigut imminnut allanulluunniit navianartorsiortitsisinnaanersut pillugit ullup unnuallu ingerlanerani pingasoriarluta naliilersortarpagut. Annikinnerpaamilluunniit pasitsaassaqaraangatta aneersinneq ajorpagut. Una maannakkut napparsimasuuterput allanut navianartorisiortitsisinnaanngitsoq nalilersoqqissaarneqareerpoq, Mette Daae Krøyer oqarpoq, taamaattumillu "toqutsisutut navianarluinnartutut" tusagassiuutini taagorneqarnera ilisarisinnaanngilluinnarlugu.
Risskovimi tarnikkut nappaatilinnut napparsimavimmiit uningasuutit 20-it ukioq kingulleq qimaasimapput, Dansk Folkepartiillu tamakku akulikippallaarnerat ippassaq ingasappallaarnerapaa.
- Pissutissaqarpoq maani paarisaammata. Inuupput naviaanaateqarluinnartutut taaaneqartartut, Marlene Harpsøe TV2-mi nutaarsiassanut oqarpoq.
Tarnimikkut nappaatilinnut napparsimavimmi peqqissaasuuneq ilanngullugu ilisimatitsivoq, 19-inik ukiulik maanngaanneersuusoq qanittukkut anersinneqarnavianngitsoq.
