Ullut ataatsimiiffissat ikippallaarsoraat

Inuiaqatigiinnut pingaarutilimmik inatsisartut suliaqarmata ullut ataatsimiiffissat amerlanerusariaqaraluartut partiit inuusuttaasa ilaat isumaqarput.
Allattoq Mads Lynge
septembarip 20-at 2007 16:57

Inatsisartut ukiaanerani ataatsimiinnerat aqagu aallarnerneqassaaq, pilersaarutillu naapertorlugit ataatsimiinneq ingerlassappat ullut katillugit ulluni 25-ni ataatsimiittoqassaaq.

Partiit inuusuttaat paasiniaavigaavut oqaluuserisassat 132-t ulluni 25-iinnarni oqaluuserissallugit sivikippallaarnersoq naammaginarnersorluunniit. Inuusuttut Ataqatigiit siulittaasuat Jane Petersen siulliulluni ima oqarpoq:

- Oqllaisigineqartussat inuiaqatigiinnut tamarmik pingaaruteqarmata, Inuusuttut Ataqatigiit isumaqarpugut peqqissaartumik sulisoqaraluartoq, piffissaq sivikippallaartoq, Jane Petersen oqarpoq.

Siumukkut inuusuttaasa siulittaasuat Benjamin Kielsen akerlianik isumaqarpoq:

- Aappaatigut isumaqatiginarsinnaapput soorunami, kisianni inatsisartut siulittaasoqarfii piareersarluarlutik ingerlasarmata, ullut ataatsimiiffiususussat 25-iusut naammaginartutut uanga isigivakka, Benjamin Kielsen oqarpoq.

Atassutip inuusuttaasa siulittaasuat, Karl Peter Grim, illuatungiliilluni oqarpoq inuiaqatigiinnut pingaarutilimmik suliaqartilluni iluamik piffissaqarnissaq pingaaruteqartoq:

- Inuiaqatigiinnut tunngasunik oqallisissagaanni peqqissaarunneqarnerusumik sulisoqarnissaa pingaaruteqarpoq, taamaammat ulllut ataatsimiiffissat ikippallaarsoraakka, Atassutikkut inuusuttaasa siulittaasuat Karl Peter Grim oqarpoq.