Ullut 100-t siulliit killiffissiorlugit

Naalakkersuisut ulluni siullerni 100-ni politikkerisimasaat illuatungiliuttut ersernerluppallaarsimanasoraat. Aleqa Hammondip siuttuunermini ulluni 100-ni siullerni angusaminik naliliinera sioqqullugu taamatut oqaaseqaateqartoqarpoq.
Allattoq Nutaarsiassaqartitsivik / Nyhedsredaktionen, Simon Uldum
juulip 11-at 2013 13:35

Demokraatit siulittaasuat Jens B. Frederiksen isumaqarpoq, naalakkersuisunngortut juulip sisamaani ullunik 100-nngortorsiornerminni sunik angusaqarsimanersut takujuminaattoq.

- Ajoraluartumik oqartariaqarpunga, politikki ingerlataat paatsiveerunnartupilussuusoq suleriaaserisaallu ersernerluttuusut. Naalakkersuisooqatigiit politikkiat sunerpiaq imaqarnersoq paasiuminaatsittupilussuuara,  Jens B. Frederiksen KNR-imut oqarpoq.

Naaja Nathanielsenip IA-meersup aamma Aleqa Hammond imminut nersualaarnissaminik mianersuussisariaqarsoraa.

- Naalakkersuisut atuunnerminni ullut 100-t siulliit angusaqarsimagunik, taava naalakkersuisut siuliisa aallartisarsimasaannik tamanna aallaaveqakkajuttarpoq, Naaja Nathanielsen nassuiaavoq.

Naalakkersuisooqatigiit saqqummiunneqarnerini qulequtarineqartut annersaat tassaavoq suliffissaaleqineq, Jens B. Frederikseninili pikkunaatsooqqavoq.

-Sumi qanorlu iliortoqarniarnersoq takusinnaanngilara, oqarpoq.

Aleqa Hammond ullut 100-t siulliit pillugit aqagu ualikkut nal. 13.30 tusagassiortunik katersortitsissaaq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq