Ullumikkut ulloq tupamut akiuiniarnerup ulloraa
Soorlu Ilulissani pitsaaliuinermut illumi, Illumiut 8-mi ualimut marluniit sisamanut aaqqissuussisoqarpoq.
Ilulissani pitsaaliuinermut siunnersortip Helga Nielsenip oqaatigaa pujortarunnaarnissamik kissaateqartut pitsaaliuinermut illumut ualeq manna saaffiginnissinnaasut.
Aammattaaq oqaatigaa sikaritsip akorpassuisa ilaat, kulilte, tassa aamarsuit ikummarliortut ipinartuat, pillugu dvd-mik takutitsisoqarniartoq.
Pitsaaliuinermut siunnersortip oqaatigaa qanittukkut inuusuttunik qulinik pujortarunnaarnissamut pikkorissaasimalluni, taakkunanngalu pujortarunnaartoq ataaseq marlulluunniit ualimut allagartamik tunineqassasut.
Aap, pujortarunnaarniarneq ajornaatsuinnaaneq ajorpoq, ullumikkutulli akiuiniarnermik ulloqartitsinikkut eqqarsariarnissaq siunertarineqarpoq.