Ullumikkut ulloq Naligiissitaanerup Ullua
- Kinaluunniit namminiorusussusilik nukittunerpaasarpoq. Namminiorusussuseqarit pisinnaatitaaffitillu ilisimaaralugit, Naligiissitaanerup Ulluani, maajip 20-ani, kajumissaarutigineqarpoq.
Ulloq 2011-miilli nalliuttorsiutigineqartartoq. Inuit Ataqatigiit siunnersuuteqareernerata kingorna atuutsilersinneqarsimasoq.
Kalaallit Nunaanni Naligiissitaanissamut Siunnersuisoqatigiit MIO-lu suleqatigiillutik meeqqanut atuakkiortitsiniarput.
- Naligiissitaaneq tassaavoq meeqqat ataasiakkaat periarfissinnissaat nammineerlutik iliuuseqarnissaminnut ineriartornissaminnullu, isummiussat oqqanik killilersorneqaratik, tassalu nukappiaqqat sunik niviarsiaqqallu sunik pisinnaasaqarnissaannik, sunissaannik susinnaanerinnillu. Eqqortumik oqartoqarsinnaanngilaq niviarsiaqqat illuatungaanilu nukappiaqqat qanoq ittuunissaannik, siunnersuisoqatigiit tusagassiutinut nalunaarumminni allapput.
Meeqqanut atuakkiap meeqqat inersimasullu naleqartitat oqaluuserinissaannut isumassarsisissavai. Atuakkap meeqqanik atuartisinermi atorneqarnissaa siunertaavoq, saqqummerpalli aamma pisiarineqarsinnaassaaq.
Ulloq malunnartinniarlugu Naligiissitaanermut Naalakkersuisoq aamma oqariartuuteqarpoq:
- Aalajangiisoqaraangat naligiissitaanermut tunngasut tamatta eqqaamasassavagut, tamanna Inatsisartuni, inuussutissarsiutini, meeqqerivinni assigisaannilu aalajangiinerni atuuppoq. Naligiissitaaneq suiaassutsit ataatsimoorfinni assigiinngitsuni agguagaanerannit annertuneruvoq – naligiissitaaneq tassaavoq inuunermi tamani assigiinngiiaassuseq, naligiinneq ataqqinninnerlu, Nick Nielsen oqarpoq.