Ullumikkut timisartuussinissat tamangajammik taamaatinneqarput
Kalaallit Nunaanni silaannaq ippassaq timmiffigeqqusaajunnaarpoq, tamanna Air Greenlandip timmisartortitseqatigiiffiillu allat angallannerannik eqquivoq.
Nalilersoruminaatsorujussuuvoq. Kalaallit Nunaanni Atlantikullu avannaani ullumikkut maajip ulluisa 27-anni timmisartuussinissat tamaasa Air Greenlandip taamaatiinnartariaqarpai.
Angalasussat 1.000-ngajalluinnaat nassatassallu tonsit 20-t taamaalillutik eqqugaapput.
Sapaatip-akunnerata naanerani immikkut timmisartuussinissaminut Air Greenland piareersimavoq, ilaasussat nassiussallu apuuffissaminnut tuaviornerpaamik apuukkusullugit. Sapaatip-akunnerata naanerani timmisartuussinissamut neriunaateqarluarpoq, ullumikkulli timmisartuussinissat tamarmik tassa taamaatiinnarneqarput.
Timmisartuutileqatigiiffiup Air Greenlandip erseqqissaatigaa, ilaasut timmisartullu isumannaatsuunissaat pingaarnerpaasoq, taamaammat timmisartuusisoqassanngitsoq. Suliffeqarfiulli oqartussaasut timmisartuutiminnillu sanaartortut ataavartumik attaveqarfigaat, suna isumannaannerpaanersoq paasiniarlugu.
Kujataanili, taavalu Narsarsuarmiit Nuummut, ulloqeqqata kingorna timmisartuussisoqarsinnaassasoq naatsorsuutigineqarpoq.
Air Greenlandimili niuernermut pisortap, Christian Keldsenip, ullaaq-manna erseqqissaatigaa, periarfissaasinnaasut tamarmik misissorneqareersut, kisianni Canada Islandilu timmisartuussinissamut periarfissanik tassa akuersisinnaanngikkallartut unnerpaa.
- Marloriaammik timmisartuussisinnaangilagut, aamma timmisartorsuarmik Atlantiku ikaarlugu aqagu timmisussamik attartorsinnaanngilagut, ilaasussammi Kalaallit Nunaat tamakkerlugu siammarsimapput, uagullu timmisartuutivut ilaasussanik, nassatanik nassiussassanillu maani nunatta iluani ingerlatsisinnaasut killeqarput. Kisianni qaqqap innermik anitsisup qullaatsitai annertuvallaanngippata aqagu sapaatiuppallu timmisartuussinisasrput naatsorsuutigaarput. Taamaammat ilaasussat aammaarluta qinnuigaavut naammagittaqqullugit, Christian Keldsen oqarpoq.
Innermik anitsisup qullaatsitai Atlantikup avannaata annersaanut siaruaassimapput, qullaatsitallu pissutaallutik sinerissatta Kitaani - Nuummiit avannamut - aqqut tassa matoqqavoq.
Timmisartuussinissat nutaat pillugit ilaasussat Air Greenlandimit attaveqarfigineqarumaarput.