Ullumikkut qinersineq nikeriarnermut aalajangiisinnaavoq
Kommuninut ullumikkut qinersineq kingullermik qinersinermit allaaneruva? Tamanna qinersisarnernut malinnaasartumut, tusagassiortumut Emma Kristensen-imut nalilersortippagut. Emma Kristensen-ilu ima naliliivoq:
- Maluginiarneq ajornakusoorpoq kommunit 18-iummata inuppassuillu qineqqusaarmata qulequtarpassuillu qineqqusaarutigineqarmata taamaattumik ataatsimut eqikkarlugit oqaatigineqarpiarsinnaagunanngilaq suna maluginiassaneripput. Kisianni qinersinermi uani soqutiginaateqassooq partiit qanoq inissinnerat.
Demokraatit Nuumi partiitut anginersanngornissartik siunertaralugu qineqqusaarput, Emma Kristensen-illu pissanganartippaa massakkut borgmesteriusumut Agnethe Davidsen-imut Demokraatit siulittaasuat Per Berthelsen unammillermat.
Sineriammilu soorlu Uummannami Atassutikkut kingullermernit amerlanerullutik sassartiaqarput, tamatuma Siumut Uummannami nukittunerujuartup qanoq inissinnissaanut sunniuteqarnissaa pissanganartoq Emma Kristensen aamma oqarpoq.
- Aamma Qaqortumi qanoq inerneqarnissaa pissanganarpoq Inuit Ataqatigiit Demokraatillu suleqatigeeriataassangaluarpata Siumut pissaanermik tunniussisariaqartussanngussammat. Upernavimmissaaq Atassutikkut aamma amerlasoorujussuupput, taamatullu Qeqertarsuarmi Atassut sinnerlugu borgmesteriusimasoq Augusta Salling aamma qineqqusaarluni.
- Tusaamanarpoq borgmesterinngorusulluni sassartoq. Siumut sinnerlugu borgmesteriusoq Lars Karl Jensen qinerneqarluartarmata aamma tamatuma qanoq inerneqarnissaa pissanganartoq Emma Kristensen oqarpoq.
Partiit inuusuttaminnik maanna qimoriarsaalersutut nalilerpai:
- Folketingimi qinersinermi malunnarpoq inuusuttut ilisarisimanngisagut sassartunut ilaasut. Tamatuma partiinut ataasiakkaanut sunniutissaa pissanganarpoq, tamanna siumut tikkuussisutullusooq issinnaammat nuna tamakkerlugu politikkissamut, nutaat kingusinnerusukkut sassariarsinnaammata, soorlu Inatsisartunut.
Ullumikkut qinersinerup inernissaa Emma Kristensen-ip nalileruminaatsippaa, kisiannili Demokraatit Nuummi annerpaanngorusuttut sineriammi sorlanissinnaanissaat pissangartillugu.
- Demokraatit Nuummiinnaq sunniuteqarnerat angisoorsuujuaannassappat, nuna tamakkerlugu makeriarnissaat ajornakusuussammat. Massakkut takussavarput Demokraatit allami sorlanissimanersut Atassutikkullu suli unammisinnaanersut.
