Ullumikkut nunarsuaq tamakkerlugu utoqqaat ulloraat
Ullumikkut ulloq Naalagaaffiit Peqatigiit nunarsuarmi tamarmi utoqqarnut ulloritippaat tamannalu atorluarlugu inuusuttut kulturitta nukittorsarnissaa siuarsarnissaalu siunertaralugit suliniuteqarnerat utoqqaat tapersersortariaqarpaat.
Taama isumaqarpoq Asii Chemnitz Narup tallimanngormat Nuummi ingerlaaqatigiinneq innersuussutigalugu.
Tassami tallimanngormat Nuummi inuit arlalinnik untritillit ingerlaaqatigiipput kulturip politikerinit tapersersorneqarnerunissaa kajumissaarutiginiarlugu.
Taamaattorli aamma utoqqaat tapersersuisariaqartut Asii Chemnitz Narup isumaqarpoq.
- Asasavut Nunatsinni utoqqaat - ilissi ilisimasasi, misilittakkasi pingaartitasilu ingerlariaqqinnissami pingaaruteqaqaat. Inuiattut kulturikkut ilisarnaatit piginnaanerillu ilissi ilitsoqqussasi inuusuit ilarpassuinut ingerlateqqinneqarsimanngillat, takkua namminneq oqarnerattuut anersaakkut piitsunngorsaatigeqisaannik kinguneqartumik, Asii Chemnitz Narup allappoq.
Asii Chemnitz Narupip soorlu utoqqaat peqatigiiffiini kalaallisut kulturitta qanoq iliornikkut tammatsaalillugulu ingerlateqqinneqarsinnaanerata oqallisigineqarnissaa kajumissaarutigaa.
