Ullumikkut meeqqat ulloraat

Ullumikkut ulloq nunarsuarmi meeqqat ulloraat, tamannalumi aamma maani nunatsinni malunnartinneqassaaq. Erfalasulisaartoqanngikkaluarluni oqalugiartorpassuaqanngikkaluarlunilu ballonit takussaanerussagunarput, pølsetortoqassalluni qitittoqassagunavillunilu.

Assersuutigalugu Qaqortumi meeqqat 220-t missaanniittut meeraaqqerivinneersut meeqqerivinneersullu illoqarfiup qeqqani naapissapput. Meeqqat erinarsussapput ataatsimoorlutillu arsaattarfitoqqamut ingerlaaqatigiissallutik. Arsaattarfitoqqami assigiinngitsunik pinnguartoqassaaq, taamatuttaaq meeqqat utoqqaallu arsaallutik unammissallutik.

Ilulissani ulloq tamangajaat malunnartitsiniaasoqassaaq, titartaanermik, oqaluttualiornermik taalliornermillu sapaatip akunnera kingulleq unammisitsisoqarsimavoq ajugaasullu pingasut ullo’qeqqata siorna nal. 10.30 suaarutigineqassapput, tamanna Ilulissani arsaattarfimmi pissalluni, akissarsiassaq anneq tassaalluni 1.000 koruuni. Tamatuma kingornatigut kulturikkut illorsuarmi timersortarfissuarmilu aaqqissuussinerit assigiinngitsut ingerlanneqassapput, soorlu meeqqat namminneq oqaluttualiaannik oqaluttuartoqassalluni. Tamakku tamaasa naggaserlugit meeqqanut inuusuttunullu qititsitsisoqassaaq, siullermik 13-it tungaannut ukiulinnut kingornagullu 13-ileereersimasunut.

Nuummi meeqqat Inussivimmi nal. ataatsimiit sisamat tungaannut naaperratissapput, Kapisilinnilu Atuarfiup pisortaa Elvira Olsen aamma nalunaarpoq, Kapisilinni meeqqat nal. arfineq’pingasunut nalinginnaasumik atuariartussasut, nal. qulingiluanut pisuttuaqatigiittoqassaaq, qulinut arsaattoqassaaq, aqqanermut tanneq qulingiluat allunaasamik noqqoruunneq, qatserisartut nal. aqqanermut susassaqartitsissapput, taavalu ulloqeqqasiorneq/ siaasaaneq nal. aqqanermut pissalluni. Sammisassanik ullup sinnerani ingerlatitseqqinnissaq nalunaaqutaq ataatsimiit oqaluuserineqassaaq.