Ullumikkut kigutigissarnerup ulloraa
Sabina Eugeniusip Nuummi kigutileriffimmeersup oqaatigaa, aqqaneq marlunnik ukiullit sodavanditorpallaarnertik pissutigalugu kigutaat seernartunittartut neriorneqalerlutillu. Tamannalu iliuuseqarfiginiarneqartoq.
Nuummi kigutileriffimmeersut illoqarfimmi 6. klassimi atuartut tamaasa pulaarniarpaat, kigutillu seernartumit ajoquserneqartarnerat paasisitsiniutigalugu. Aamma atuartut akeqanngitsunik imermik imerfissaannik aamma mobilinut ikkussassanik tuniorarneqassapput.
Kigutileriffimmiut aamma ullumikkut nalunaaqutaq quliniit ataatsinut Brugsenip eqqaani nerrivilerlutik siunnersuillutillu kigutigissaatinik qaqorsaataannillu tunioraaniarput.
Tamatuma saniatigut Nuummi Kigutileriffimmiut bussinut normu 2-nut ilaasunut kigutigissartarnermik qarngullu eqqiluitsuutinnissaanik siunnersuiniarput.
